Áleýmettik jelide Shymkent qalalyq bilim basqarmasynan 20-ǵa jýyq qyzmetkerdiń jappai jumystan ketkeni týraly aqparat tarady. Qoǵam belsendisi Ońǵar Qabden qyzmetkerlerdiń bul áreketine uzaqqa sozylatyn jinalystar sebep bolýy múmkin ekenin aitqan edi. Osyǵan bailanysty Dalanews.kz redaktsiiasy bilim basqarmasyna resmi saýal joldap, mán-jaidy anyqtady.
Bilim basqarmasynan neshe qyzmetker ketken?
Buǵan deiin qoǵam belsendisi Ońǵar Qabden áleýmettik jelidegi paraqshasynda jańa oqý jyly bastalǵaly Shymkent qalalyq bilim basqarmasynan 20-ǵa jýyq qyzmetker óz erkimen jumystan ketkenin jazǵan edi.
“Oqý jyly bastalǵanyna bir jarym ai boldy. Al Shymkent qalalyq bilim basqarmasynan 20-ǵa jýyq qyzmetker jumystan óz erkimen ketip qalǵan. Ákim orynbasarynyń 15:00-de bastalyp, 21:00-ge deiin sozylatyn jinalysynan qajysa kerek. Sonda alty saǵattyq jinalysta ne máseleni talqylaidy eken?”, – dep jazdy qoǵam belsendisi.
Osy aqparattyń qanshalyqty ras ekenin anyqtaý úshin Dalanews.kz redaktsiiasy Shymkent qalalyq bilim basqarmasyna resmi saýal joldady.
Basqarma redaktsiiaǵa bergen jaýabynda áleýmettik jelide taraǵan málimetti joqqa shyǵardy.
“Áleýmettik jelide jariialanǵan Shymkent qalasynyń bilim basqarmasy qyzmetkerleriniń jappai jumystan shyǵýyna qatysty aqparat shyndyqqa sáikes kelmeitindigin habarlaimyz. Naqtyraq aitqanda, atalǵan kezeńde basqarmadan 4 qyzmetkerdiń eńbek qatynastary toqtatylǵan”, – delingen resmi jaýapta.
Qyzmetkerler ne sebepti jumystan ketken?
Bilim basqarmasy tórt qyzmetkerdiń jumystan ketýine qatysty da túsinikteme berdi.
Mekeme málimetinshe, eńbek qatynastary Qazaqstan Respýblikasynyń Eńbek kodeksinde belgilengen tártipke sáikes toqtatylǵan. Ár qyzmetkerdiń jaǵdaiy jeke qaralǵan.
Sonymen qatar basqarma jumystan ketken qyzmetkerlerdiń sheshimine mekeme basshylyǵynyń qatysy joq ekenin málimdedi.
“Atalǵan qyzmetkerlerdiń jumystan shyǵýyna Bilim basqarmasynyń basshylyǵy sebep bolǵan joq”, – dep habarlady vedomstvo.
Alaida resmi jaýapta qyzmetkerlerdiń naqty qandai sebeptermen jumystan ketkeni jáne olardyń qandai laýazymdardy atqarǵany kórsetilmegen.
