قازاقستاندا تٷزەۋ مەكەمەلەرٸندەگٸ سوتتالعانداردى ازىق-تٷلٸكپەن قامتاماسىز ەتۋگە بٶلٸنگەن بيۋدجەت قاراجاتىن جىمقىرۋ دەرەگٸ بويىنشا تەرگەۋ باستالدى. ۇلتتىق قاۋٸپسٸزدٸك كوميتەتٸنٸڭ سىبايلاس جەمقورلىققا قارسى قىزمەتٸ ٸشكٸ ٸستەر مينيسترلٸگٸنە قاراستى «ەڭبەك» مەملەكەتتٸك كەسٸپورنىنىڭ باسشىلىعىن ۇستادى, دەپ حابارلايدى dalanews.kz.
ۇستالعاندار قاتارىندا كەسٸپورىن ديرەكتورى ەرمەك شۋرمانوۆ پەن ازىق-تٷلٸكپەن قامتاماسىز ەتۋ باسقارماسىنىڭ باسشىسى فۋركات حۋدايبەرگەنوۆ بار. ولار ەلدەگٸ تٷزەۋ مەكەمەلەرٸندە جازاسىن ٶتەپ جاتقان ازاماتتاردى ازىق-تٷلٸكپەن قامتاماسىز ەتۋگە جاۋاپتى بولعان.
سىبايلاس جەمقورلىققا قارسى قىزمەت نۇسقاسى بويىنشا, كٷدٸكتٸلەر سوتتالعاندارعا ارنالعان ازىق-تٷلٸك قورىن پايدالانىپ, بيۋدجەت قاراجاتىن جىمقىرعان بولۋى مٷمكٸن.
قاۋٸپسٸزدٸك ورگاندارىنىڭ نازارىنا تٷزەۋ مەكەمەلەرٸنەن تٷسكەن شاعىمدار لەگٸ ٸلٸككەن. تەكسەرۋ نەتيجەسٸندە «ەڭبەك» رمك-دا ازىق-تٷلٸك جەتكٸزۋگە قاتىستى كٷمەندٸ سحەما قۇرىلعانى انىقتالعان. اتاپ ايتقاندا, ميللياردتاعان تەڭگەنٸڭ ازىق-تٷلٸك جەتكٸزٸلٸمٸ بٸر كومپانييانىڭ قولىنا شوعىرلانىپ, جاساندى مونوپولييا قالىپتاسقان.
مۇنىڭ سالدارىنان ازىق-تٷلٸك تاپشىلىعى تۋىنداپ, تٷزەۋ مەكەمەلەرٸنە ساپاسىز, تٸپتٸ شٸرٸگەن ٶنٸمدەر جەتكٸزٸلگەنٸ ايتىلىپ وتىر. قازٸر كٷدٸكتٸلەر قاماۋعا الىنعان. تەرگەۋ ورگاندارى مەملەكەتكە كەلتٸرٸلگەن زالالدىڭ ناقتى كٶلەمٸن انىقتاپ جاتىر.
باقىلاۋشىلاردىڭ پٸكٸرٸنشە, ٸٸم قۇرىلىمىنداعى لاۋازىمدى تۇلعالاردىڭ ۇستالۋىن مينيسترلٸك پەن ونىڭ باسشىسى ەرجان سەدەنوۆ ٷشٸن ەلەۋلٸ بەدەلدٸك سوققى دەپ باعالاۋعا بولادى.
«قورعانسىز جاعدايدا وتىرعان ادامداردى اسىراۋعا بٶلٸنگەن بيۋدجەت قاراجاتىن يەمدەنٸپ, ولارعا ساپاسىز ٶنٸم بەرۋ ونسىز دا كٷردەلٸ جاعدايدا تۇرعان كولونييالارداعى احۋالدى ۋشىقتىردى. بۇل نارازىلىق پەن بٷلٸك شىعۋ قاۋپٸن تۋدىردى. مەسەلەنٸ ٸشكٸ ٸستەر مينيسترلٸگٸنٸڭ ٶز قاۋٸپسٸزدٸك قىزمەتٸ ەمەس, ۇقك-نٸڭ بەيٸندٸ بٶلٸمشەسٸ انىقتاعانى ۆەدومستۆو ٸشٸندەگٸ باقىلاۋ جٷيەسٸنٸڭ جاعدايىنا قاتىستى كٶپ جايتتى اڭعارتادى. جٷيە ٸشٸندەگٸ لاۋازىمدى تۇلعالاردىڭ بيۋدجەت قاراجاتىن وسىنداي اشىق تٷردە جىمقىرۋى مينيسترلٸك باسشىلىعىنىڭ جەكە جاۋاپكەرشٸلٸگٸ تۋرالى مەسەلەنٸ كٷن تەرتٸبٸنە شىعارادى», – دەپ جازادى شولۋشىلار.
