Qazaqstanda tájiribelik-konstrýktorlyq ázirlemelerge jumsalatyn ǵylymi qarjynyń úlesi 2022 jylǵy 12,8%-dan 2025 jyly 4,7%-ǵa deiin tómendegen. Bul týraly 11 qarashada Quryltaida ǵylymdy qarjylandyrýǵa qatysty Joǵary aýditorlyq palatanyń esebi qaralǵan kezde aityldy, dep habarlaidy dalanews.kz.
Baiandamada ǵylymi zertteýlerdi qarjylandyrý kólemin arttyrý jetkiliksiz ekeni, qarajattyń naqty tehnologiialar men óndiristik sheshimderge ainalýyna da jaǵdai jasaý qajettigi atap ótildi.
Tájiribelik-konstrýktorlyq ázirlemeler ǵylymi ideiany daiyn ónimge nemese óndiriste qoldanýǵa bolatyn tehnologiiaǵa ainaldyrý kezeńin qamtidy. Sondyqtan bul baǵytqa bólinetin qarajat úlesiniń tómendeýi zertteý nátijelerin óndiriske engizý máselesine nazar aýdarýdy qajet etedi.
Baiandama avtory Úkimetke irgeli zertteýler, qoldanbaly ǵylym jáne tájiribelik-konstrýktorlyq ázirlemeler arasyndaǵy qarjylandyrý teńgerimin baǵalaýdy usyndy. Sonymen qatar ǵylymi jobalardyń synaqtan ótýine jáne óndiriste qoldanylýyna deiingi kezeńderdi qoldaý qajettigi aityldy.
Ǵylymi jobalardy kommertsiialandyrý kezinde tehnologiianyń daiyndyq deńgeii, oǵan degen suranys, engizý shyǵyndary jáne ónerkásiptik seriktestiń qatysýy aldyn ala baǵalanýy kerek.
Sondai-aq jobany qarjylandyrý aiaqtalǵannan keiin onyń nátijesin baqylaý usynyldy. Mundai monitoring aiasynda ázirlemeniń is júzinde qoldanylyp jatqany, investitsiia tartylǵany jáne óndiristik tiimdilikke qol jetkizilgeni tekserilýi tiis.
Baiandamada Qazaqstanda ǵylymmen ainalysatyn 425 uiym bar ekeni, olarda shamamen 27 myń adam, onyń ishinde 23 myńǵa jýyq zertteýshi jumys isteitini aityldy.
Quryltaidaǵy talqylaýda ǵylymdy qarjylandyrýdyń basty ólshemi tek bólingen qarajat kólemi emes, onyń nátijesinde jasalǵan tehnologiialar men óndiriste qoldanylǵan ázirlemeler bolýy kerektigi atap ótildi.
