2026 jylǵy 12 qańtarda Ǵylym ordasynda BR28712621 «Qazaqstannyń qoljazba murasy: reestrleý, restavratsiialaý, ǵylymi katalogtaý, tsifrlandyrý jáne keshendi kodikologiialyq zertteý» ǵylymi jobasy aiasynda zertteýshi ǵalymdarmen kezdesý ótti, dep habarlaidy Dalanews.kz.
Kezdesýge Ǵylym ordasynyń bas direktory Ular Muqajanov, Joba jetekshisi Nurlan Atygaev, Qoljazbataný ǵylymi-zertteý ortalyǵynyń jetekshisi Yqtiiar Paltóre jáne shyǵys tilderindegi qoljazba murany zertteýshi ǵalymdar qatysty.
Jiyn barysynda jobanyń oryndalý barysy, qoljazba muralardy reestrleý men ǵylymi katalogtaýdyń ádistemesi, restavratsiialaý jáne tsifrlandyrý jumystarynyń qazirgi ahýaly talqylandy. Sonymen qatar joba aiasynda júrgizilip jatqan zertteýlerdiń nátijeleri, biylǵa josparlanǵan mindetter men ǵylymi ónimderdiń sapasyn arttyrý máseleleri qarastyryldy.
Ǵylym ordasynyń bas direktory Ular Muqajanov óz sózinde jobanyń ózektiligine toqtalyp, qoljazbalardy saqtaý, qoljazbataný salasyndaǵy zertteýlerdi ǵylymi ainalymǵa engizý, tsifrlandyrý jumystaryn kúsheitý jáne kitaphana infraqurylymyn jaqsartý qajettigin atap ótti. Sondai-aq Ǵylym ordasy qyzmetkerlerin ǵylymi-zertteý jumystaryna tartý, zertteý nátijeleri boiynsha jazylǵan ǵylymi maqalalardy birlesip jariialaý, ǵylymi eńbekterdiń sheteldik basylymdarda jaryq kórýi arqyly ǵylymi áleýetti arttyrýdyń mańyzdylyǵyn aitty.
Kezdesýde 2025 jylǵa arnalǵan jyldyq eseptiń sátti qorytyndylanǵany aitylyp, 2026 jylǵa arnalǵan aýqymdy ǵylymi maqsattar belgilendi. Atap aitqanda, Ǵylym jáne joǵary bilim berý salasyndaǵy sapany qamtamasyz etý komiteti usynǵan basylymdarda, sondai-aq Scopus derekqoryna kiretin jýrnaldarda maqalalar men monografiialar jariialaý josparlanyp otyr. Osy baǵytta zertteý toptary qurylyp, joba múshelerine úlken jaýapkershilik júkteldi. Jumystar kúntizbelik josparǵa sáikes jalǵasyp, qatysýshylardyń tiimdi jumys isteýi úshin qajetti tehnikalyq qural-jabdyqtarmen qamtamasyz etildi.
Kezdesý sońynda qatysýshylar jobanyń ulttyq ǵylymi murany saqtaýdaǵy mańyzyn erekshe atap ótip, vedomstvoaralyq yntymaqtastyqty kúsheitý, ǵylymi zertteý jumystaryna jas zertteýshilerdi tartý jáne halyqaralyq standarttarǵa sai derekqor qalyptastyrý jóninde usynystaryn bildirdi.
