2026 جىلعى 12 قاڭتاردا عىلىم ورداسىندا BR28712621 «قازاقستاننىڭ قولجازبا مۇراسى: رەەسترلەۋ، رەستاۆراسيالاۋ، عىلىمي كاتالوگتاۋ، سيفرلاندىرۋ جانە كەشەندى كوديكولوگيالىق زەرتتەۋ» عىلىمي جوباسى اياسىندا زەرتتەۋشى عالىمدارمەن كەزدەسۋ ءوتتى، دەپ حابارلايدى Dalanews.kz.
كەزدەسۋگە عىلىم ورداسىنىڭ باس ديرەكتورى ۇلار مۇقاجانوۆ، جوبا جەتەكشىسى نۇرلان اتىگايەۆ، قولجازباتانۋ عىلىمي-زەرتتەۋ ورتالىعىنىڭ جەتەكشىسى ىقتيار پالتورە جانە شىعىس تىلدەرىندەگى قولجازبا مۇرانى زەرتتەۋشى عالىمدار قاتىستى.
جيىن بارىسىندا جوبانىڭ ورىندالۋ بارىسى، قولجازبا مۇرالاردى رەەسترلەۋ مەن عىلىمي كاتالوگتاۋدىڭ ادىستەمەسى، رەستاۆراسيالاۋ جانە سيفرلاندىرۋ جۇمىستارىنىڭ قازىرگى احۋالى تالقىلاندى. سونىمەن قاتار جوبا اياسىندا جۇرگىزىلىپ جاتقان زەرتتەۋلەردىڭ ناتيجەلەرى، بيىلعا جوسپارلانعان مىندەتتەر مەن عىلىمي ونىمدەردىڭ ساپاسىن ارتتىرۋ ماسەلەلەرى قاراستىرىلدى.
عىلىم ورداسىنىڭ باس ديرەكتورى ۇلار مۇقاجانوۆ ءوز سوزىندە جوبانىڭ وزەكتىلىگىنە توقتالىپ، قولجازبالاردى ساقتاۋ، قولجازباتانۋ سالاسىنداعى زەرتتەۋلەردى عىلىمي اينالىمعا ەنگىزۋ، سيفرلاندىرۋ جۇمىستارىن كۇشەيتۋ جانە كىتاپحانا ينفراقۇرىلىمىن جاقسارتۋ قاجەتتىگىن اتاپ ءوتتى. سونداي-اق عىلىم ورداسى قىزمەتكەرلەرىن عىلىمي-زەرتتەۋ جۇمىستارىنا تارتۋ، زەرتتەۋ ناتيجەلەرى بويىنشا جازىلعان عىلىمي ماقالالاردى بىرلەسىپ جاريالاۋ، عىلىمي ەڭبەكتەردىڭ شەتەلدىك باسىلىمداردا جارىق كورۋى ارقىلى عىلىمي الەۋەتتى ارتتىرۋدىڭ ماڭىزدىلىعىن ايتتى.
كەزدەسۋدە 2025 جىلعا ارنالعان جىلدىق ەسەپتىڭ ءساتتى قورىتىندىلانعانى ايتىلىپ، 2026 جىلعا ارنالعان اۋقىمدى عىلىمي ماقساتتار بەلگىلەندى. اتاپ ايتقاندا، عىلىم جانە جوعارى ءبىلىم بەرۋ سالاسىنداعى ساپانى قامتاماسىز ەتۋ كوميتەتى ۇسىنعان باسىلىمداردا، سونداي-اق Scopus دەرەكقورىنا كىرەتىن جۋرنالداردا ماقالالار مەن مونوگرافيالار جاريالاۋ جوسپارلانىپ وتىر. وسى باعىتتا زەرتتەۋ توپتارى قۇرىلىپ، جوبا مۇشەلەرىنە ۇلكەن جاۋاپكەرشىلىك جۇكتەلدى. جۇمىستار كۇنتىزبەلىك جوسپارعا سايكەس جالعاسىپ، قاتىسۋشىلاردىڭ ءتيىمدى جۇمىس ىستەۋى ءۇشىن قاجەتتى تەحنيكالىق قۇرال-جابدىقتارمەن قامتاماسىز ەتىلدى.
كەزدەسۋ سوڭىندا قاتىسۋشىلار جوبانىڭ ۇلتتىق عىلىمي مۇرانى ساقتاۋداعى ماڭىزىن ەرەكشە اتاپ ءوتىپ، ۆەدومستۆوارالىق ىنتىماقتاستىقتى كۇشەيتۋ، عىلىمي زەرتتەۋ جۇمىستارىنا جاس زەرتتەۋشىلەردى تارتۋ جانە حالىقارالىق ستاندارتتارعا ساي دەرەكقور قالىپتاستىرۋ جونىندە ۇسىنىستارىن ءبىلدىردى.
