Mamyrda "Drýjba" munai qubyry arqyly Germaniiadaǵy Shvedt zaýytyna baǵyttalǵan qazaqstandyq munai tranziti tolyq toqtaýy múmkin. Osyǵan bailanysty munaidy qalai qaita bólýge bolady jáne onyń ekonomikaǵa áseri qandai degen suraq týyndaidy, dep habarlaidy Dalanews.kz.
Qazaq Expert Club uiymynyń kólik logistika salasyndaǵy sarapshysy Ainur Diveevanyń aitýynsha, Atyraý - Samara baǵyty arqyly "Drýjba" júiesine shyǵatyn marshrýt Eýropaǵa munai jetkizýdiń tiimdi ári qalyptasqan tizbegi sanalady. Onyń úzilýi logistikalyq tepe-teńdikti buzyp, jetkizý júiesiniń turaqtylyǵyna áser etedi.
Qysqa merzimde naryq munaidy qaita baǵyttaý arqyly beiimdeledi. Sarapshynyń sózinshe, belgili bir kólem Kaspii arqyly Transkaspii baǵytyna jiberilýi múmkin. Alaida bul baǵyttar qymbat ári kúrdeli bolǵandyqtan, soltústik baǵytty tolyq ári jedel almastyrý qiyn.
Sonymen qatar, keiingi jyldary Qazaqstan munai eksportyn ártaraptandyryp, balama baǵyttardy damytty. Bul jaǵdai júiege osyndai irkilisterde beiimdelýge múmkindik beredi jáne jalpy eksport kólemine aitarlyqtai áser etpeidi.
Qazaq Expert Club sarapshysy, qarjyger Venera Janalina da másele qysqa merzimge áser etetinin aitty. Energetika ministrliginiń málimetinshe, Atyraý - Samara baǵyty arqyly jylyna shamamen 3 mln tonna munai tasymaldanady, bul jalpy eksporttyń 3,7 paiyzyna teń.
2025 jyly naqty jetkizilim kólemi 2,1 mln tonna nemese shamamen 2,6 paiyz bolǵan. Demek, bul kórsetkish búkil ekonomika aýqymynda asa úlken úleske ie emes, sondyqtan birden makroekonomikalyq soqqy kelmeidi.
Sarapshylardyń pikirinshe, negizgi másele kólemde emes, logistikalyq jáne tranzittik qaýip artýynda. Bul eksporttaýshylar úshin qaýipti kúsheitip, shyǵyndy arttyrady.
