مامىردا "درۋجبا" مۇناي قۇبىرى ارقىلى گەرمانياداعى شۆەدت زاۋىتىنا باعىتتالعان قازاقستاندىق مۇناي ءترانزيتى تولىق توقتاۋى مۇمكىن. وسىعان بايلانىستى مۇنايدى قالاي قايتا بولۋگە بولادى جانە ونىڭ ەكونوميكاعا اسەرى قانداي دەگەن سۇراق تۋىندايدى، دەپ حابارلايدى Dalanews.kz.
Qazaq Expert Club ۇيىمىنىڭ كولىك لوگيستيكا سالاسىنداعى ساراپشىسى اينۇر ديۆەيەۆانىڭ ايتۋىنشا، اتىراۋ - سامارا باعىتى ارقىلى "درۋجبا" جۇيەسىنە شىعاتىن مارشرۋت ەۋروپاعا مۇناي جەتكىزۋدىڭ ءتيىمدى ءارى قالىپتاسقان تىزبەگى سانالادى. ونىڭ ءۇزىلۋى لوگيستيكالىق تەپە-تەڭدىكتى بۇزىپ، جەتكىزۋ جۇيەسىنىڭ تۇراقتىلىعىنا اسەر ەتەدى.
قىسقا مەرزىمدە نارىق مۇنايدى قايتا باعىتتاۋ ارقىلى بەيىمدەلەدى. ساراپشىنىڭ سوزىنشە، بەلگىلى ءبىر كولەم كاسپيي ارقىلى ترانسكاسپيي باعىتىنا جىبەرىلۋى مۇمكىن. الايدا بۇل باعىتتار قىمبات ءارى كۇردەلى بولعاندىقتان، سولتۇستىك باعىتتى تولىق ءارى جەدەل الماستىرۋ قيىن.
سونىمەن قاتار، كەيىنگى جىلدارى قازاقستان مۇناي ەكسپورتىن ءارتاراپتاندىرىپ، بالاما باعىتتاردى دامىتتى. بۇل جاعداي جۇيەگە وسىنداي ىركىلىستەردە بەيىمدەلۋگە مۇمكىندىك بەرەدى جانە جالپى ەكسپورت كولەمىنە ايتارلىقتاي اسەر ەتپەيدى.
Qazaq Expert Club ساراپشىسى، قارجىگەر ۆەنەرا جانالينا دا ماسەلە قىسقا مەرزىمگە اسەر ەتەتىنىن ايتتى. ەنەرگەتيكا مينيسترلىگىنىڭ مالىمەتىنشە، اتىراۋ - سامارا باعىتى ارقىلى جىلىنا شامامەن 3 ملن توننا مۇناي تاسىمالدانادى، بۇل جالپى ەكسپورتتىڭ 3،7 پايىزىنا تەڭ.
2025 جىلى ناقتى جەتكىزىلىم كولەمى 2،1 ملن توننا نەمەسە شامامەن 2،6 پايىز بولعان. دەمەك، بۇل كورسەتكىش بۇكىل ەكونوميكا اۋقىمىندا اسا ۇلكەن ۇلەسكە يە ەمەس، سوندىقتان بىردەن ماكروەكونوميكالىق سوققى كەلمەيدى.
ساراپشىلاردىڭ پىكىرىنشە، نەگىزگى ماسەلە كولەمدە ەمەس، لوگيستيكالىق جانە ترانزيتتىك ءقاۋىپ ارتۋىندا. بۇل ەكسپورتتاۋشىلار ءۇشىن ءقاۋىپتى كۇشەيتىپ، شىعىندى ارتتىرادى.
