Germaniianyń batys óńirlerinde meteorit qulaǵany baiqaldy. Bul qubylysty birneshe federaldyq jerdiń turǵyndary kórgen,dep habarlaidy Dalanews.kz "Deutsche Welle"-ge silteme jasap.
Kýágerlerdiń aitýynsha, aspanda jarqyraǵan otty nysan ushyp ótken. Ony Tómengi Saksoniia, Gessen, Reinland-Pfalts, Saar, Baden-Viýrtemberg jáne Soltústik Rein — Vestfaliia turǵyndary baiqaǵan. Áleýmettik jelilerde oqiǵaǵa qatysty beinejazbalar men fotosýretter tarady.
Meteorittiń synyqtary Germaniianyń batysyndaǵy birneshe turǵyn úidiń shatyryn zaqymdaǵan. Mundai aqparat Koblents qalasy men Hýnsriýk jáne Aifel taýly aimaqtarynan túsken.
Politsiianyń jedel shtabynyń málimetinshe, 8 naýryz kúni shamamen saǵat 19:00-de Koblents qalasynyń Giýls aýdanyndaǵy turǵyn úidiń shatyryna «janyp ketken aspan denesi» qulaǵan. Aldyn ala derek boiynsha eshkim zardap shekpegen, oqiǵa ornyna órt sóndirýshiler men politseiler barǵan.
Alaida Agence France-Presse agenttiginiń málimetinshe, keibir adamdar jeńil jaraqat alýy múmkin.
Politsiianyń habarlaýynsha, turǵyndar aspanda «jarqyrap ushyp bara jatqan nysandy» kórgenin aitqan. Keibiri ony zymyran bolýy múmkin dep boljaǵan.
Quqyq qorǵaý organdary bul oqiǵanyń áskeri árekettermen bailanysty emes ekenin jáne qoǵamdyq qaýipsizdikke qater joq ekenin málimdedi.
