گەرمانيانىڭ باتىس وڭىرلەرىندە مەتەوريت قۇلاعانى بايقالدى. بۇل قۇبىلىستى بىرنەشە فەدەرالدىق جەردىڭ تۇرعىندارى كورگەن،دەپ حابارلايدى Dalanews.kz "Deutsche Welle"-گە سىلتەمە جاساپ.

كۋاگەرلەردىڭ ايتۋىنشا، اسپاندا جارقىراعان وتتى نىسان ۇشىپ وتكەن. ونى تومەنگى ساكسونيا، گەسسەن، رەينلاند-پفالس، ساار، بادەن-ۆيۋرتەمبەرگ جانە سولتۇستىك رەين — ۆەستفاليا تۇرعىندارى بايقاعان. الەۋمەتتىك جەلىلەردە وقيعاعا قاتىستى بەينەجازبالار مەن فوتوسۋرەتتەر تارادى.

مەتەوريتتىڭ سىنىقتارى گەرمانيانىڭ باتىسىنداعى بىرنەشە تۇرعىن ءۇيدىڭ شاتىرىن زاقىمداعان. مۇنداي اقپارات كوبلەنس قالاسى مەن حۋنسريۋك جانە ايفەل تاۋلى ايماقتارىنان تۇسكەن.

پوليسيانىڭ جەدەل شتابىنىڭ مالىمەتىنشە، 8 ناۋرىز كۇنى شامامەن ساعات 19:00-دە كوبلەنس قالاسىنىڭ گيۋلس اۋدانىنداعى تۇرعىن ءۇيدىڭ شاتىرىنا «جانىپ كەتكەن اسپان دەنەسى» قۇلاعان. الدىن الا دەرەك بويىنشا ەشكىم زارداپ شەكپەگەن، وقيعا ورنىنا ءورت سوندىرۋشىلەر مەن پوليسەيلەر بارعان.

الايدا Agence France-Presse اگەنتتىگىنىڭ مالىمەتىنشە، كەيبىر ادامدار جەڭىل جاراقات الۋى مۇمكىن.

پوليسيانىڭ حابارلاۋىنشا، تۇرعىندار اسپاندا «جارقىراپ ۇشىپ بارا جاتقان نىساندى» كورگەنىن ايتقان. كەيبىرى ونى زىمىران بولۋى مۇمكىن دەپ بولجاعان.

قۇقىق قورعاۋ ورگاندارى بۇل وقيعانىڭ اسكەري ارەكەتتەرمەن بايلانىستى ەمەس ەكەنىن جانە قوعامدىق قاۋىپسىزدىككە قاتەر جوق ەكەنىن مالىمدەدى.