Teniz Capital Investment Banking direktorlar keńesiniń múshesi Ǵalym Qusaiynov jańa saiasat Qazaqstan ekonomikasynyń aldynda turǵan zamanaýi syn-qaterlerge jaýap beretinin jáne basty nazar eldiń ishki investitsiialyq áleýetine aýdarylatynyn atap ótti, dep habarlaidy Dalanews.kz.
"Búgin biz JIÓ-niń 450 mlrd dollar sipatyndaǵy maqsatty deńgeiine qalai jetýge bolatynyn talqyladyq. Investitsiiany molynan tartpai, oǵan qol jetkizý múmkin emes. Sondyqtan Ulttyq ekonomika ministrliginiń memlekettiń investitsiialyq saiasatqa anaǵurlym belsendi qatysýǵa kóshýi týraly usynysy dáleldi jáne ýaqtyly nárse", - dedi ol.
Onyń aitýynsha, damý institýttaryn, sonyń ishinde birinshi kezekte «Báiterek» holdingin, osy jumystarǵa aýqymdy túrde tartý memleketten el ishindegi naqty salalar men jobalarǵa kapitaldyń qozǵalysyn qamtamasyz etetin qarjy infraqurylymyn qurýǵa múmkindik beredi. Bul rette sheteldik kompaniialardy kapital kózderi retinde ǵana emes, quzyretterdiń, tehnologiialar men basqarý praktikalarynyń tasymaldaýshylary retinde de tartý mańyzdy.
"Eń bastysy, memleket bastamashylyq etetin jobalardyń túsinikti ekonomikalyq modeli, irikteý men súiemeldeýdiń ashyq tetigi bolýy tiis. Sonda olar jeke kapitaldy halyqaralyq deńgeide de tarta alady. Onsyz ósim biýdjettik qarjylandyrý sheńberimen shekteledi", - dep atap ótti sarapshy.
Sondai-aq ol jańa saiasat jeke sektor men bank júiesiniń rólin naqty anyqtaýy kerek ekenin atap ótti. Ázirge, "investitsiia qalai bólinedi jáne kommertsiialyq bankter bul protseske qanshalyqty belsendi qatysady" degen suraq ashyq kúiinde qalyp otyr. Bir jaǵynan, memlekettiń tikelei qatysýy kepildik pen jyldamdyqty qamtamasyz etedi, ekinshi jaǵynan, jeke bastamalardy da umytpaý úshin naryqtyq tetikterdi saqtaý mańyzdy.
Ǵalym Qusaiynov memlekettik jáne naryqtyq quraldardy saýatty úilestire bilý Qazaqstanǵa artyq infliatsiiadan aýlaq bola otyryp, ekonomikalyq ósýdiń sapaly jańa deńgeiine shyǵýǵa múmkindik beretinin aitty.
Buǵan deiin Ulttyq ekonomika ministrligi janyndaǵy saraptamalyq keńestiń otyrysynda Qazaqstannyń ekonomikalyq ósiminiń jańa proaktivti saiasaty qaralyp jatqanyn jazǵanbyz. Bul rette Úkimettiń basty maqsaty – 2029 jylǵa qarai eldegi JIÓ-ni eki ese arttyryp, 450 mlrd dollarǵa deiin jetkizý. Bul mindetti Úkimet aldyna Memleket basshysy Qasym-Jomart Toqaev qoiyp otyr. Sondai-aq Serik Jumanǵarin bul rette praktivti saiasattyń draiveri Investment Board bolatynyn aitty.
