Teniz Capital Investment Banking ديرەكتورلار كەڭەسىنىڭ مۇشەسى عالىم قۇسايىنوۆ جاڭا ساياسات قازاقستان ەكونوميكاسىنىڭ الدىندا تۇرعان زاماناۋي سىن-قاتەرلەرگە جاۋاپ بەرەتىنىن جانە باستى نازار ەلدىڭ ىشكى ينۆەستيسيالىق الەۋەتىنە اۋدارىلاتىنىن اتاپ ءوتتى، دەپ حابارلايدى Dalanews.kz.
"بۇگىن ءبىز ءجىو-نىڭ 450 ملرد دوللار سيپاتىنداعى ماقساتتى دەڭگەيىنە قالاي جەتۋگە بولاتىنىن تالقىلادىق. ينۆەستيسيانى مولىنان تارتپاي، وعان قول جەتكىزۋ مۇمكىن ەمەس. سوندىقتان ۇلتتىق ەكونوميكا مينيسترلىگىنىڭ مەملەكەتتىڭ ينۆەستيسيالىق ساياساتقا اناعۇرلىم بەلسەندى قاتىسۋعا كوشۋى تۋرالى ۇسىنىسى دالەلدى جانە ۋاقتىلى نارسە"، - دەدى ول.
ونىڭ ايتۋىنشا، دامۋ ينستيتۋتتارىن، سونىڭ ىشىندە ءبىرىنشى كەزەكتە «بايتەرەك» حولدينگىن، وسى جۇمىستارعا اۋقىمدى تۇردە تارتۋ مەملەكەتتەن ەل ىشىندەگى ناقتى سالالار مەن جوبالارعا كاپيتالدىڭ قوزعالىسىن قامتاماسىز ەتەتىن قارجى ينفراقۇرىلىمىن قۇرۋعا مۇمكىندىك بەرەدى. بۇل رەتتە شەتەلدىك كومپانيالاردى كاپيتال كوزدەرى رەتىندە عانا ەمەس، قۇزىرەتتەردىڭ، تەحنولوگيالار مەن باسقارۋ پراكتيكالارىنىڭ تاسىمالداۋشىلارى رەتىندە دە تارتۋ ماڭىزدى.
"ەڭ باستىسى، مەملەكەت باستاماشىلىق ەتەتىن جوبالاردىڭ تۇسىنىكتى ەكونوميكالىق مودەلى، ىرىكتەۋ مەن سۇيەمەلدەۋدىڭ اشىق تەتىگى بولۋى ءتيىس. سوندا ولار جەكە كاپيتالدى حالىقارالىق دەڭگەيدە دە تارتا الادى. ونسىز ءوسىم بيۋدجەتتىك قارجىلاندىرۋ شەڭبەرىمەن شەكتەلەدى"، - دەپ اتاپ ءوتتى ساراپشى.
سونداي-اق ول جاڭا ساياسات جەكە سەكتور مەن بانك جۇيەسىنىڭ ءرولىن ناقتى انىقتاۋى كەرەك ەكەنىن اتاپ ءوتتى. ازىرگە، "ينۆەستيسيا قالاي بولىنەدى جانە كوممەرسيالىق بانكتەر بۇل پروسەسكە قانشالىقتى بەلسەندى قاتىسادى" دەگەن سۇراق اشىق كۇيىندە قالىپ وتىر. ءبىر جاعىنان، مەملەكەتتىڭ تىكەلەي قاتىسۋى كەپىلدىك پەن جىلدامدىقتى قامتاماسىز ەتەدى، ەكىنشى جاعىنان، جەكە باستامالاردى دا ۇمىتپاۋ ءۇشىن نارىقتىق تەتىكتەردى ساقتاۋ ماڭىزدى.
عالىم قۇسايىنوۆ مەملەكەتتىك جانە نارىقتىق قۇرالداردى ساۋاتتى ۇيلەستىرە ءبىلۋ قازاقستانعا ارتىق ينفلياسيادان اۋلاق بولا وتىرىپ، ەكونوميكالىق ءوسۋدىڭ ساپالى جاڭا دەڭگەيىنە شىعۋعا مۇمكىندىك بەرەتىنىن ايتتى.
بۇعان دەيىن ۇلتتىق ەكونوميكا مينيسترلىگى جانىنداعى ساراپتامالىق كەڭەستىڭ وتىرىسىندا قازاقستاننىڭ ەكونوميكالىق ءوسىمىنىڭ جاڭا پرواكتيۆتى ساياساتى قارالىپ جاتقانىن جازعانبىز. بۇل رەتتە ۇكىمەتتىڭ باستى ماقساتى – 2029 جىلعا قاراي ەلدەگى ءجىو-نى ەكى ەسە ارتتىرىپ، 450 ملرد دوللارعا دەيىن جەتكىزۋ. بۇل مىندەتتى ۇكىمەت الدىنا مەملەكەت باسشىسى قاسىم-جومارت توقايەۆ قويىپ وتىر. سونداي-اق سەرىك جۇمانعارين بۇل رەتتە پراكتيۆتى ساياساتتىڭ درايۆەرى Investment Board بولاتىنىن ايتتى.
