Filippinniń ońtústik araldaryna jaqyn mańda magnitýdasy 6,4-6,7 bolatyn jer silkinisi boldy. Qazirgi tańda qiraǵan ǵimarattar men zardap shekkender týraly aqparat túsken joq, dep habarlaidy Dalanews.kz "Reuters"-ke silteme jasap.
AQSh Geologiialyq qyzmetiniń málimetinshe, jer silkinisi jer betinen 10 shaqyrym tereńdikte, Hinatýan qalasyna qarasty Bakýlin aýylynan shamamen 68 shaqyrym shyǵysta bolǵan.
Filippinniń seismologiialyq agenttigi yqtimal qiraýlar men aftershoktar bolýy múmkin ekenin eskertti. Alaida politsiia men qutqarý qyzmetteri ázirge jer silkinisi saldarynan eshqandai zaqym nemese adam shyǵyny tirkelmegenin málimdedi.
Hinatýan qalasynyń politsiia basshysy Djoi Monatonyń aitýynsha, jer dúmpýleri qatty bolmaǵanymen, turǵyndar qaýiptenip, úilerinen syrtqa shyqqan.
Al seismologiialyq agenttik direktory Teresito Bakolkol jer silkinisiniń epitsentri 2025 jyldyń qazan aiynda birneshe kúshti jer silkinisi bolyp, jeti adam qaza tapqan aýmaqtan 10 shaqyrymǵa da jetpeitin jerde ornalasqanyn aitty.
Mamandardyń habarlaýynsha, 7 qańtar kúni tsýnami qaýpi joq.
Aita keteiik, Filippin aýmaǵy Tynyq muhitynyń «Otty beldeýinde» ornalasqan. Bul óńirde jer silkinisteri men janartaý atqylaýy jii bolyp turady.
