ءفيليپپيننىڭ وڭتۇستىك ارالدارىنا جاقىن ماڭدا ماگنيتۋداسى 6،4-6،7 بولاتىن جەر سىلكىنىسى بولدى. قازىرگى تاڭدا قيراعان عيماراتتار مەن زارداپ شەككەندەر تۋرالى اقپارات تۇسكەن جوق، دەپ حابارلايدى Dalanews.kz "Reuters"-كە سىلتەمە جاساپ.

اقش گەولوگيالىق قىزمەتىنىڭ مالىمەتىنشە، جەر سىلكىنىسى جەر بەتىنەن 10 شاقىرىم تەرەڭدىكتە، حيناتۋان قالاسىنا قاراستى باكۋلين اۋىلىنان شامامەن 68 شاقىرىم شىعىستا بولعان.

ءفيليپپيننىڭ سەيسمولوگيالىق اگەنتتىگى ىقتيمال قيراۋلار مەن افتەرشوكتار بولۋى مۇمكىن ەكەنىن ەسكەرتتى. الايدا پوليسيا مەن قۇتقارۋ قىزمەتتەرى ازىرگە جەر سىلكىنىسى سالدارىنان ەشقانداي زاقىم نەمەسە ادام شىعىنى تىركەلمەگەنىن مالىمدەدى.

حيناتۋان قالاسىنىڭ پوليسيا باسشىسى دجوي موناتونىڭ ايتۋىنشا، جەر دۇمپۋلەرى قاتتى بولماعانىمەن، تۇرعىندار قاۋىپتەنىپ، ۇيلەرىنەن سىرتقا شىققان.

ال سەيسمولوگيالىق اگەنتتىك ديرەكتورى تەرەسيتو باكولكول جەر سىلكىنىسىنىڭ ەپيسەنترى 2025 جىلدىڭ قازان ايىندا بىرنەشە كۇشتى جەر سىلكىنىسى بولىپ، جەتى ادام قازا تاپقان اۋماقتان 10 شاقىرىمعا دا جەتپەيتىن جەردە ورنالاسقانىن ايتتى.

مامانداردىڭ حابارلاۋىنشا، 7 قاڭتار كۇنى سۋنامي ءقاۋپى جوق.

ايتا كەتەيىك، فيليپپين اۋماعى تىنىق مۇحيتىنىڭ «وتتى بەلدەۋىندە» ورنالاسقان. بۇل وڭىردە جەر سىلكىنىستەرى مەن جانارتاۋ اتقىلاۋى ءجيى بولىپ تۇرادى.