Májilis depýtaty Erlan Sairov Qazaqstanda filmderdi tekseretin komissiia qurý keregin málimdedi, dep habarlaidy Dalanews.kz.
Depýtattyń sózinshe, sońǵy kezderi qoǵamda birlik pen tutastyqty nyǵaitýdan góri, halyqty jikke bólýge beiim úderis kúsheiip keledi.
Jekelegen kontent óndirýshiler men kásipkerler rýlyq sanany jalaýlatyp, kúndelikti tutynatyn fýtbolka men shapandarǵa rý ataýyn jazyp, olardy «brend» nemese «marketingtik ónim» retinde satylymǵa shyǵarýda.
Áleýmettik jelilerde jastarǵa rýshyldyq psihologiiany tańatyn kontent shekten shyǵyp ketti.
"Bul ulttyń birligin ishinen qurtatyn qaýipti tendentsiia kinoǵa da jetti. Osyndai kelissiz, qajetsiz taqyrypty arqaý etken arnaiy film prokatqa shyǵypty. Bul arqyly kino túsirýshilerdiń ne aitpaq bolǵany túsiniksiz?! Qazaqtyń rýlaryn salystyratyn, kemsitetin filmderdiń maqsaty qandai? Tipti bul filmdi jarnamalaý úshin jasalǵan arnaiy ekzpozitsiiada rýǵa bólinýdi qoiyp, Qazaqstannyń kartasyn úsh júzge bólip qoiǵandy kórdik. Bul ne degen bassyzdyq?", - deidi Sairov.
Depýtat ol – ult úshin eń sezimtal taqyrypty aiqailatyp áleýmettik kontent, kino taqyrybyna ainaldyryp, kórermen jinaý ekenin, al onyń túbi bul jaqsylyqqa ákelmeitinin atap ótti.
"Tvorchestvolyq bostandyq qajet. Biraq tvorchestvolyq bostandyq myna alai-dúlei zamanda, ulttyń birligin buzyp, memlekettiliktiń tamyryn qiiýǵa qabiletti deńgeige shyqpaýy tiis. Jasóspirimder úshin kino jáne mediakontenttiń tárbielik yqpaly joǵary ekenin eskersek, bul máselege beijai qaraýǵa bolmaidy. Danyshpan Abai «Atanyń balasy bolma, adamnyń balasy bol» dep beker aitpaǵan", - deidi májilismen.
Depýtattyń sózinshe rýshyldyq tendentsiia qoǵam ishinde memlekettik oilaý qabiletin korroziiaǵa ushyratyp, memlekettilikti shashyratýǵa ákeletin – qaýipti qubylys.
"Ǵalam máńgi bolsa, sonsha máńgi bolatyn Qazaqstandy quramyz desek, ult ishinde artyqshylyǵymyzdy kemshilik dep kórsetetin, bir ult ishindegi rýlardy bir-birine aidap salatyn, arandatýshylyq materialdarǵa tyiym salynýy kerek".
Osyǵan bailanysty Erlan Sairov kelesi sharalardy qabyldaý oryndy dep sanaidy.
- Aqparat jáne mádeniet ministrligi janynan kinoprokatqa shyǵatyn otandyq filmderdiń mazmunyn aldyn ala kórkemdik-estetikalyq, ideologiialyq, ulttyq birlik turǵysynan saraptaityn turaqty komissiia qurýdy túrde iske asyrý qajet.
- «Ulttyq kod» jáne «mádeni erekshelik» uǵymyn jeleý etip, qoǵamdy bólshekteýge, rýshyldyq pen jikshildikti nasihattaityn áreketterge naqty tosqaýyl qoiý kerek.
- Mádeni salada, áleýmettik jelide, Qazaqstannyń barlyq halyqtarynyń birligin kórsetetin, jalpyulttyq «Biz Qazaqpyz» degen maǵynadaǵy kontentti kóbeitýge kirisýge tiispiz.
