Abai oblysynda «QazAvtoJol» respýblikalyq mańyzy bar «Qaraǵandy – Aiagóz – Tarbaǵatai – Boǵaz» avtomobil jolyn normativtik jaǵdaiǵa keltirý jumystaryn kezeń-kezeńimen jalǵastyryp keledi. Biyl tasjoldyń 66 shaqyrymy ortasha jóndeýmen qamtyldy, dep habarlaidy dalanews.kz.
Abai oblysy aýmaǵyndaǵy avtomobil jolynyń jalpy uzyndyǵy 618 shaqyrymdy quraidy. Onyń 384 shaqyrymy 320–704 shaqyrym aralyǵyn, taǵy 234 shaqyrymy 707–941 shaqyrym aralyǵyn qamtidy. Bul ýchaskelerdegi qozǵalys qarqyndylyǵy táýligine orta eseppen 314-ten 576 avtokólikke deiin jetedi.
Tasjol 1978–1980 jyldary salynǵan. Jalpy uzyndyǵynyń 440 shaqyrymy III tehnikalyq sanatqa, 178 shaqyrymy IV sanatqa jatady. Jol boiynda 24 kópir jáne 426 sý ótkizý qubyry ornalasqan.
«Tasjoldy jańartý jumystary kezeń-kezeńimen júrgizilýde. 2025 jyly 60 shaqyrym jol ortasha jóndeýmen qamtyldy. Atap aitqanda, 497–528, 541–548, 561–568 jáne 793–808 shaqyrym aralyǵyndaǵy ýchaskeler jóndeldi. Qazirgi tańda bul ýchaskelerdegi jumystar tolyq aiaqtaldy. Nysandar kepildik merziminde tur. Osy kezeńde paidalaný barysynda anyqtalǵan aqaýlardy merdiger uiymdar joiýǵa mindetti. 2026 jyly taǵy 66 shaqyrym jolda jóndeý jumystary jalǵasty. Onyń ishinde 707–717, 724–747 jáne 757–790 shaqyrym aralyǵyndaǵy ýchaskeler qamtyldy», – dedi «QazAvtoJol» UK» AQ Abai oblystyq filialy direktorynyń orynbasary Almat Shoiynbaev.
Alǵashqy eki ýchaskede jalpy uzyndyǵy 33 shaqyrym bolatyn jóndeý jumystary tolyq aiaqtaldy. Al 757–790 shaqyrym aralyǵyndaǵy 33 shaqyrymdyq ýchaskede jóndeý bekitilgen jumys kestesine sáikes jalǵasýda.
707–717 shaqyrym aralyǵyndaǵy ýchaskede joldyń aiazdan isingen bólikteri qalpyna keltirilip, jol tósemine sýyq resaikling júrgizildi jáne jańa asfaltbeton jamylǵysynyń eki qabaty tóseldi. Sondai-aq jol jiekteri nyǵaitylyp, aialdamalar men jolaýshylar alańdary abattandyryldy, jaryqtandyrý júiesi ornatylyp, jol tańbalary syzyldy. 709-shaqyrymda áskeri tehnikanyń ótýine arnalǵan arnaiy ótkel jabdyqtaldy.
724–747 shaqyrym aralyǵyndaǵy 23 shaqyrymdyq ýchaskede de aýqymdy jumystar atqaryldy. Munda sýyq resaikling júrgizilip, asfaltbeton jamylǵysynyń tómengi jáne joǵarǵy qabattary tóseldi, jol jiekteri nyǵaityldy. 735-shaqyrymda jańa sý ótkizý qubyry ornatyldy. Sonymen qatar joldy jailastyrý jáne qozǵalys qaýipsizdigin qamtamasyz etýge baǵyttalǵan jumystar oryndaldy.
Tasjoldy kútip ustaý tek aýqymdy jóndeý jobalarymen shektelmeidi. Jol boiynda shuńqyrlardy jóndeý, jaryqtardy biteý, jol tańbalaryn syzý, jol belgilerin qalpyna keltirý, shóp shabý jáne kólik qozǵalysynyń qaýipsiz ári úzdiksiz bolýyn qamtamasyz etýge baǵyttalǵan basqa da jumystar turaqty túrde júrgiziledi.
Tasjoldy jańartý jumystary aldaǵy ýaqytta da jalǵasady. BRK-3 aiasynda tiisti qarjy bólingen jaǵdaida taǵy 52 shaqyrym joldy ortasha jóndeýden ótkizý, sondai-aq alty kópirge kúrdeli jóndeý júrgizý josparlanyp otyr.
Bul tasjolmen kún saiyn aýyr júk kólikteri, sonyń ishinde iri ken oryndarynan júk tasymaldaityn kólikter qatynaidy. Turaqty ári joǵary júkteme jol jamylǵysynyń birtindep tozýyna áser etedi. Osyǵan bailanysty 2027 jyly iri kólemdi jáne aýyr salmaqty kólikterdi baqylaýǵa arnalǵan avtomattandyrylǵan ólsheý júielerin ornatý josparlanǵan. Bul belgilengen salmaq talaptarynyń saqtalýyn baqylaýdy kúsheitip, jol jamylǵysyna túsetin artyq júktemeni azaitýǵa múmkindik beredi.
