Frantsiianyń burynǵy prezidenti Jak Shiraktyń áieli Bernadett Shirak 93 jasynda qaitys boldy, dep habarlaidy dalanews.kz.
Bernadett Shirak 5 maýsym kúni keshke ómirden ozǵan.
Bernadett Shirak Frantsiia tarihynda sailanbaly saiasi qyzmet atqarǵan jalǵyz birinshi hanym boldy. Ol 1979 jyldan 2015 jylǵa deiin Korrez departamentiniń bas keńesshisi qyzmetin úzdiksiz atqardy.
Frantsiia prezidenti Emmanýel Makron marqumnyń jaqyndaryna kóńil aityp, ony "júregi keń uly áiel" dep atady.
"Ol bizdiń tarihymyzda iz qaldyrdy, náziktik pen tabandylyqtyń arqasynda talai adamnyń ómirin ózgertti", – dep jazdy frantsýz kóshbasshysy.
Makron onyń frantsýz aýrýhanalary qorynyń basshysy retinde atqarǵan eńbegin de atap ótti. Prezidenttiń aitýynsha, Bernadett Shirak bul qyzmetinde milliondaǵan qarapaiym naýqasqa kómek kórsetken.
Bernadett Shirak 1933 jyly 18 mamyrda Parijde diplomattar otbasynda dúniege kelgen. Sciences Po oqý ornynda bilim alyp júrgen kezinde ol Frantsiianyń bolashaq prezidenti Jak Shirakpen tanysqan. Ekeýi 1956 jyly shańyraq kóterip, 60 jyldan astam ýaqyt birge ómir súrdi.
Kúieýiniń prezidenttik kezeńinde Bernadett Shirak bastapqyda kópshilik nazarynan tys júrdi. Alaida 2002 jyly Jak Shiraktyń qaita sailanýyna mańyzdy ról atqardy.
Ol aýrýhanada emdelip jatqan balalarǵa kómek kórsetýge arnalǵan «Sary tiyndar» qaiyrymdylyq naýqanynyń jetekshisi retinde frantsýzdar arasynda úlken qurmetke ie boldy.
Jak Shirak 2019 jyldyń qyrkúieginde 86 jasynda qaitys bolǵan. Ol 1995 jyldan 2007 jylǵa deiin 12 jyl boiy Frantsiia prezidenti boldy. Sondai-aq eki ret el premer-ministri, úsh ret Parij meri qyzmetin atqarǵan.
