فرانتسييانىڭ بۇرىنعى پرەزيدەنتٸنٸڭ ەيەلٸ بەرنادەتت شيراك قايتىس بولدى

فرانتسييانىڭ بۇرىنعى پرەزيدەنتٸ جاك شيراكتىڭ ەيەلٸ بەرنادەتت شيراك 93 جاسىندا قايتىس بولدى, دەپ حابارلايدى dalanews.kz.

بەرنادەتت شيراك 5 ماۋسىم كٷنٸ كەشكە ٶمٸردەن وزعان.

بەرنادەتت شيراك فرانتسييا تاريحىندا سايلانبالى ساياسي قىزمەت اتقارعان جالعىز بٸرٸنشٸ حانىم بولدى. ول 1979 جىلدان 2015 جىلعا دەيٸن كوررەز دەپارتامەنتٸنٸڭ باس كەڭەسشٸسٸ قىزمەتٸن ٷزدٸكسٸز اتقاردى.

فرانتسييا پرەزيدەنتٸ ەممانۋەل ماكرون مارقۇمنىڭ جاقىندارىنا كٶڭٸل ايتىپ, ونى "جٷرەگٸ كەڭ ۇلى ەيەل" دەپ اتادى.

"ول بٸزدٸڭ تاريحىمىزدا ٸز قالدىردى, نەزٸكتٸك پەن تاباندىلىقتىڭ ارقاسىندا تالاي ادامنىڭ ٶمٸرٸن ٶزگەرتتٸ", – دەپ جازدى فرانتسۋز كٶشباسشىسى.

ماكرون ونىڭ فرانتسۋز اۋرۋحانالارى قورىنىڭ باسشىسى رەتٸندە اتقارعان ەڭبەگٸن دە اتاپ ٶتتٸ. پرەزيدەنتتٸڭ ايتۋىنشا, بەرنادەتت شيراك بۇل قىزمەتٸندە ميلليونداعان قاراپايىم ناۋقاسقا كٶمەك كٶرسەتكەن.

بەرنادەتت شيراك 1933 جىلى 18 مامىردا پاريجدە ديپلوماتتار وتباسىندا دٷنيەگە كەلگەن. Sciences Po وقۋ ورنىندا بٸلٸم الىپ جٷرگەن كەزٸندە ول فرانتسييانىڭ بولاشاق پرەزيدەنتٸ جاك شيراكپەن تانىسقان. ەكەۋٸ 1956 جىلى شاڭىراق كٶتەرٸپ, 60 جىلدان استام ۋاقىت بٸرگە ٶمٸر سٷردٸ.

كٷيەۋٸنٸڭ پرەزيدەنتتٸك كەزەڭٸندە بەرنادەتت شيراك باستاپقىدا كٶپشٸلٸك نازارىنان تىس جٷردٸ. الايدا 2002 جىلى جاك شيراكتىڭ قايتا سايلانۋىنا ماڭىزدى رٶل اتقاردى.

ول اۋرۋحانادا ەمدەلٸپ جاتقان بالالارعا كٶمەك كٶرسەتۋگە ارنالعان «سارى تيىندار» قايىرىمدىلىق ناۋقانىنىڭ جەتەكشٸسٸ رەتٸندە فرانتسۋزدار اراسىندا ٷلكەن قۇرمەتكە يە بولدى.

جاك شيراك 2019 جىلدىڭ قىركٷيەگٸندە 86 جاسىندا قايتىس بولعان. ول 1995 جىلدان 2007 جىلعا دەيٸن 12 جىل بويى فرانتسييا پرەزيدەنتٸ بولدى. سونداي-اق ەكٸ رەت ەل پرەمەر-مينيسترٸ, ٷش رەت پاريج مەرٸ قىزمەتٸن اتقارعان.