Taǵy bir tosyn qubylys: Qańtardan keiin saiasi alańnan alastalǵan Bolat Ótemuratov sońǵy kezde óziniń imidjin túzeýge qaýyrt kirisken. Buǵan ne túrtki boldy?..
«Ótemuratovtyń kól-kósir bailyǵy halyqtyń kóz jasyna shylanǵan. Ol ári ketkende «Nazarbaevtyń ámiiany» ǵana. Osy mindetti adal atqarǵany bolmasa, óz eńbegimen baiyǵan basqa biznesmenderdiń janynda jip ese almaidy. Eski Qazaqstandaǵy korrýptsiialyq sistema, ofshor daýlarynyń birde-biri Ótemuratovtyń tulǵasyn ainalyp ótpeidi. Barymta, syrymtamen tabylǵan kapitaldy syrtqa tasýda Nazarbaev Ótemuratovqa senim artty», - deidi Batys basylymy.
Sóitken Bókeń sońǵy kezde áldeneden seziktendi me, áiteýir repýtatsiiasyn túzeýge qyzý kirisipti.
Trinity Bugle-dyń aitýynsha Ótemuratov kúnderdiń kúni ózine de kezek kelerin de túsine bastaǵan. Halyqtyń keýdesin kernegen ashý-yza shetelde shalqyp ómir súretin qazaq oligarhyn alysqa uzatpaidy.
«Keshege deiin Forbes tiziminde kósh bastap kelgen Ótemuratov aiaqastynan 6-shy satyǵa syrǵyp tústi. Keshege deiin 3,5 mlrd dollaǵra ielik etken «Nazarbaevtyń ámiiany» áp-cátte 700 mln dollarǵa «kedeilenip» qaldy.
Forbes oligarhtyń bailyǵyn 2,8 mlrd dolllarǵa deiin tómendetti. Demek, basylym basshylyǵy men Ótemuratovtyń arasynda kelissóz júrgen», - deidi Trinity Bugle.
Batys basylymy «Forbes Ótemuratovtan para alýy múmkin» dep topshylaidy.
«Shirigen bailardyń reitingin túzetin jýrnaldyń shikiligi kóp. Máselen, tizimde Qairat Satybaldy esim-soiy joq. Nege? Nazarbaevtyń nemere inisi shyn máninde eldegi eń bai adamnyń biri. Satybaldynyń ústinen is qozǵalmai tura da Forbes ony tizimge kirgizýge batpady.
Al eski Qazaqstannyń tusynda Forbes reitinginen túspei, Qulybaevpen talasyp júretin Ótemuratov artyn tazalaýǵa kóshti. Óziniń imidjin jaqsartyp, prestijin kóterý úshin biznes-basylymdardyń aýzyn mailaýǵa kiristi. Onyń qaiyrymdylyq sharalary da kóz aldaý», - deidi Trinity Bugle.
Aqorda Ótemuratovtyń álgindei qýlyq-sumdyqqa barýynyń túpki maqsatyn túsinip otyr. Toqaevtyń tóńiregi onyń «kedeilenip» qalǵanyna senbeidi. Halyqtyń aqyl-oiy da taiaz emes. El aldyndaǵy bet-álpetin túzegisi keletin Bókeńniń áreketi shynaiy emesin sezedi.
Sói degen Trinity Bugle qazaq oligarhyna qatysty basqa da kompromatty áshkere etken eken. Aitýlarynsha, Ábliazovtyń aktivterin Qazaqstannan shyǵarýǵa Ótemuratovtyń kompaniialary atsalysqan…
«Áitse de, ony tuzaqqa túsirý qiyn bolady. Óz atynda eshteńe joq. Búkil aktivin Verny Capital-ǵa aýdaryp tastaǵan. Bul qatardaǵy kompaniia emes, bútin biznes imperiia. Ol tabysyn jasyrýdyń nebir quityrqy tásilderin biledi», - deidi Batys basylymy.
Dala Inside arnasynyń paiymdaýynsha Bókeń syrtqy zańsyz shyǵarylǵan kapitaldy qaitarýǵa kirisken Jańa Qazaqstannyń qarqynynan qorqyp otyr. Al Baitasov basqaratyn Forbes-qa qoiar saýalymyz kóp. Ótemuratovtyń manipýliatsiiasy basqa da bailarǵa da oi salýy múmkin. Aldaǵy ýaqytta osy tizimniń ondyǵynda júrgen oligarhtar kúrt «kedeilene» bastasa tań qalmańyz.
