Otandyq aýyl sharýashylyǵy taýarlaryn óndirýshilerge qosymsha qun salyǵyn (QQS) tóleý nemese tólemeý quqyǵyn tańdaý ózderine qaldyrylady. Bul týraly Ulttyq ekonomika vitse-ministri Azamat Ámrin málimdedi, dep jazady Dalanews.kz.
Májilis dálizinde jýrnalisterge bergen suqbatynda vitse-ministr Prezidenttiń tapsyrmasy boiynsha alty jumys toby óńirlerge barǵanyn, kásipkerlermen, fermerlermen kezdeskenin jetkizdi. Jumys tobynyń músheleri osy kezdesýlerde aitylǵan barlyq usynystardy jinaqtap, taldaityn bolady. Sóitip olardy jýyrda Parlamenttiń qaraýyna engizý josparlanýda.
"Kásipkerlermen, onyń ishinde sharýa qojalyqtarymen, aýyl sharýashylyǵy taýaryn óndirýshilermen bolǵan kezdesýde, kerisinshe, stavkany nólge ainaldyrmai, bárin sol kúiinde qaldyrý týraly usynys ta aityldy. Sondyqtan biz osyndai quqyqty qaldyrýdy oilastyryp otyrmyz. Eger salyq tóleýshi QQS tóleýshisi bolǵysy kelse, onda oǵan osyndai quqyq berilýi kerek", – dedi Ámrin.
Onyń aitýynsha, kóptegen kásipkerler QQS-ti tirkeýdegi mólsherleme kólemin 15 millionǵa tómendetýdi qoldaǵan, óitkeni sonda ol "naryqtaǵy ádil básekelestikke yqpal ete alatyn kórinedi".
Aita ketsek, buǵan deiin Ulttyq ekonomika ministrligi QQS mólsherlemelerin saralaýdyń kelesi tetigin usynǵan bolatyn:
- jalpyǵa birdei belgilengen 16 % QQS mólsherlemesin belgileý;
- birneshe salalar úshin 10 % kóleminde aralyq mólsherleme belgileý;
- aýyl sharýashylyǵy ónimderin óndirýshilerdi QQS-tan tolyqtai bosatý.
