وتاندىق اۋىل شارۋاشىلىعى تاۋارلارىن وندىرۋشىلەرگە قوسىمشا قۇن سالىعىن (ققس) تولەۋ نەمەسە تولەمەۋ قۇقىعىن تاڭداۋ وزدەرىنە قالدىرىلادى. بۇل تۋرالى ۇلتتىق ەكونوميكا ۆيسە-مينيسترى ازامات ءامرين مالىمدەدى، دەپ جازادى Dalanews.kz.
ءماجىلىس دالىزىندە جۋرناليستەرگە بەرگەن سۇقباتىندا ۆيسە-مينيستر پرەزيدەنتتىڭ تاپسىرماسى بويىنشا التى جۇمىس توبى وڭىرلەرگە بارعانىن، كاسىپكەرلەرمەن، فەرمەرلەرمەن كەزدەسكەنىن جەتكىزدى. جۇمىس توبىنىڭ مۇشەلەرى وسى كەزدەسۋلەردە ايتىلعان بارلىق ۇسىنىستاردى جيناقتاپ، تالدايتىن بولادى. ءسويتىپ ولاردى جۋىردا پارلامەنتتىڭ قاراۋىنا ەنگىزۋ جوسپارلانۋدا.
"كاسىپكەرلەرمەن، ونىڭ ىشىندە شارۋا قوجالىقتارىمەن، اۋىل شارۋاشىلىعى تاۋارىن وندىرۋشىلەرمەن بولعان كەزدەسۋدە، كەرىسىنشە، ستاۆكانى نولگە اينالدىرماي، ءبارىن سول كۇيىندە قالدىرۋ تۋرالى ۇسىنىس تا ايتىلدى. سوندىقتان ءبىز وسىنداي قۇقىقتى قالدىرۋدى ويلاستىرىپ وتىرمىز. ەگەر سالىق تولەۋشى ققس تولەۋشىسى بولعىسى كەلسە، وندا وعان وسىنداي قۇقىق بەرىلۋى كەرەك"، – دەدى ءامرين.
ونىڭ ايتۋىنشا، كوپتەگەن كاسىپكەرلەر ءققس-تى تىركەۋدەگى مولشەرلەمە كولەمىن 15 ميلليونعا تومەندەتۋدى قولداعان، ويتكەنى سوندا ول "نارىقتاعى ءادىل باسەكەلەستىككە ىقپال ەتە الاتىن كورىنەدى".
ايتا كەتسەك، بۇعان دەيىن ۇلتتىق ەكونوميكا مينيسترلىگى ققس مولشەرلەمەلەرىن سارالاۋدىڭ كەلەسى تەتىگىن ۇسىنعان بولاتىن:
- جالپىعا بىردەي بەلگىلەنگەن 16 % ققس مولشەرلەمەسىن بەلگىلەۋ؛
- بىرنەشە سالالار ءۇشىن 10 % كولەمىندە ارالىق مولشەرلەمە بەلگىلەۋ؛
- اۋىل شارۋاشىلىعى ونىمدەرىن وندىرۋشىلەردى ققس-تان تولىقتاي بوساتۋ.
