Dúniejúzilik EXPO-2025 kórmesindegi 10 tamyz kúni Osaka qalasyndaǵy basty simvol – kiiz úi boldy. Bul kóshpeli halyqtyń baspanasy, otbasy jáne turmys-tirshiliginiń beinesi. Qazaqstan kúnderi aiasynda Astana ákimdigi qalanyń týristik áleýetin tanystyryp, onyń halyqaralyq arenadaǵy imidjin nyǵaitýdy jáne tanymaldyǵyn arttyrýdy maqsat etti,- dep habarlaidy Dalanews.kz
«Biz kiiz úidi tolyqtai, dala ómiriniń dástúrlerin, estetikasy men filosofiiasyn sińirgen tiri keńistik retinde ákeldik», – dep atap ótti Astana qalasynyń Investitsiialar jáne kásipkerlikti damytý basqarmasynyń basshysy Halel Ákimjanov.
EXPO úshin arnaiy jasalǵan biregei art-obektiler:
«Shańyraq» kinetikalyq installiatsiiasy – ishki tirektiń simvoly. Qozǵalmaityn ortalyq jáne onyń ainalasynda terbeletin sheńberler ózgermeli álemdegi tepe-teńdik pen turaqtylyqty bildiredi.
«Dastarhan» – aǵashtan oiylǵan installiatsiia, ondaǵy ainalatyn sheńberler ómir aǵashyn beineleitin órnek quraidy. Bul qonaqjailyqtyń, dialogtyń jáne urpaqtar birliginiń beinesi. Avtory – Anýar Shaimerdenov.
«Qarlyǵash uiasy» – áiel kúshi men qamqorlyǵy jaiynda. Ushyp bara jatqan qarlyǵashtar, uia jáne ortasyndaǵy shańyraq estelik, sabaqtastyq jáne sheksiz qozǵalystyń metaforasyn kórsetedi.
Kún ishinde sýretshi Rinat Ábdirahmanovtyń týǵan shańyraǵynyń taqtailarynan jinalǵan «Estelik osi» músinimen art-performans ótti. Nysan dástúr men tsifrlyq bolashaq arasyndaǵy ósý núktesi retinde beinelenedi.
Dala brendi Samal toptamasyn usyndy. Bul – qazaq estetikasynyń zamanaýi interpretatsiiasy. Jeńil pishinder, tabiǵi matalar jáne dalanyń tabiǵi tústeri mádenietti stil men pishin arqyly kúndelikti ómirdiń bóligine ainaldyrady.
