دۇنيەجۇزىلىك EXPO-2025 كورمەسىندەگى 10 تامىز كۇنى وساكا قالاسىنداعى باستى سيمۆول – كيىز ءۇي بولدى. بۇل كوشپەلى حالىقتىڭ باسپاناسى، وتباسى جانە تۇرمىس-تىرشىلىگىنىڭ بەينەسى. قازاقستان كۇندەرى اياسىندا استانا اكىمدىگى قالانىڭ تۋريستىك الەۋەتىن تانىستىرىپ، ونىڭ حالىقارالىق ارەناداعى ءيميدجىن نىعايتۋدى جانە تانىمالدىعىن ارتتىرۋدى ماقسات ەتتى،- دەپ حابارلايدى Dalanews.kz
«ءبىز كيىز ءۇيدى تولىقتاي، دالا ءومىرىنىڭ داستۇرلەرىن، ەستەتيكاسى مەن فيلوسوفياسىن سىڭىرگەن ءتىرى كەڭىستىك رەتىندە اكەلدىك»، – دەپ اتاپ ءوتتى استانا قالاسىنىڭ ينۆەستيسيالار جانە كاسىپكەرلىكتى دامىتۋ باسقارماسىنىڭ باسشىسى حالەل اكىمجانوۆ.
EXPO ءۇشىن ارنايى جاسالعان بىرەگەي ارت-وبەكتىلەر:
«شاڭىراق» كينەتيكالىق ينستاللياسياسى – ىشكى تىرەكتىڭ سيمۆولى. قوزعالمايتىن ورتالىق جانە ونىڭ اينالاسىندا تەربەلەتىن شەڭبەرلەر وزگەرمەلى الەمدەگى تەپە-تەڭدىك پەن تۇراقتىلىقتى بىلدىرەدى.
«داستارحان» – اعاشتان ويىلعان ينستاللياسيا، ونداعى اينالاتىن شەڭبەرلەر ءومىر اعاشىن بەينەلەيتىن ورنەك قۇرايدى. بۇل قوناقجايلىقتىڭ، ديالوگتىڭ جانە ۇرپاقتار بىرلىگىنىڭ بەينەسى. اۆتورى – انۋار شايمەردەنوۆ.
«قارلىعاش ۇياسى» – ايەل كۇشى مەن قامقورلىعى جايىندا. ۇشىپ بارا جاتقان قارلىعاشتار، ۇيا جانە ورتاسىنداعى شاڭىراق ەستەلىك، ساباقتاستىق جانە شەكسىز قوزعالىستىڭ مەتافوراسىن كورسەتەدى.
كۇن ىشىندە سۋرەتشى رينات ءابدىراحمانوۆتىڭ تۋعان شاڭىراعىنىڭ تاقتايلارىنان جينالعان «ەستەلىك ءوسى» مۇسىنىمەن ارت-پەرفورمانس ءوتتى. نىسان ءداستۇر مەن سيفرلىق بولاشاق اراسىنداعى ءوسۋ نۇكتەسى رەتىندە بەينەلەنەدى.
Dala برەندى Samal توپتاماسىن ۇسىندى. بۇل – قازاق ەستەتيكاسىنىڭ زاماناۋي ينتەرپرەتاسياسى. جەڭىل پىشىندەر، تابيعي ماتالار جانە دالانىڭ تابيعي تۇستەرى مادەنيەتتى ستيل مەن ءپىشىن ارقىلى كۇندەلىكتى ءومىردىڭ بولىگىنە اينالدىرادى.
