Ony áýlettiń qolyndaǵy bailyq pen shetel asqan qarjyny elge qaitarý boiynsha jasalyp jatqan birqatar jumystardan da aiqyn ańǵarýǵa bolatyndai.
DALA INSIDE telegram arnasyna jetken aqparat boiynsha Toqaev biligi eski Qazaqstanmen kúreske aýyr artilleriiany qosa bastaǵan.
Máselen, buǵan deiin Aqorda Nazarbaev áýletiniń ishtegi bailyǵyn, sheteldegi aktivterin qaitarý týraly áńgimelerdiń betin súzip, Jańbyrshin, Zaiytov, Tolyqbai, Aralbaiuly siiaqty saiasi salmaǵy az haipshyl depýtattarǵa ǵana aitqyzatyn.
Endi bul taqyrypqa Astana salmaq bere bastady. «Tema» tereńdegen.
Urysta turys joq
Soǵystyń sheshýshi kezeńine Aqorda saiasi salmaǵy bar, aýyr artilleriia sanalatyn Aidos Sarymdy iske qosty. Ol burynǵy Aidos emes, tolysqan, kemeline kelgen.
Qańtardan keiingi aýys-túiis tusynda halyqtyń Sarymǵa degen kózqarasyna qylaý túsken-di. 2022 jyldyń qańtarynan bergi Qazaqstannyń saiasi ideologiiasyn jasap, stsenariiin syzyp otyrǵan osy – Aidos Sarym.
Demek, Sarym, ol – birneshe «zaiytovtar» men «tolyqbailardyń» salmaǵy bar saiasi tulǵa.
Sarymnyń Jańa Qazaqstan kúresine ashyq tartylýy ashyq maidan bastalǵanyn kórsetedi. Toqaev biligine endi artqa qaitý joq.
Buǵan deiin Aqorda Nazarbaev áýletiniń zańsyz iemdengen, shetel asyrǵan bailyqtaryn, urlaǵan aktivterin tam-tumdap ashyq aqparat kózderine shyǵara bastasa, endigi jerde shynaiy kúres bastalady.
Oǵan naqty mysal – Aidos Sarymnyń Májilis minberinde kótergen taqyryby. Depýtat shekara zastavalaryn salýǵa bólingen qarjynyń talan-tarajǵa túsýin kóterdi. Siyrquimyshaqtanǵan iste de Nazarbaev áýletiniń qoltańbasy bar...
Aidos Sarymnyń Májiliste kótergen máselesi sózbe-sóz bylai: «Qazaqstan Respýblikasynyń aýmaqtyq qaýipsizdigin qamtamasyz etý maqsatynda 50 shekara zastavasyn salý josparlanǵan bolatyn. 2022 jyly 20 shekara zastavasyn salý boiynsha jumystardy satyp alýǵa tender jariialandy.
Oǵan 53 mlrd 894 mln teńge shamasynda merdigerlik uiymdar – «Capital Construction» jáne «Tolaǵai-2050» kompaniialarymen jalpy sharttar jasalǵan bolatyn. Osy sharttarǵa sai «Tolaǵai-2050» kompaniiasy 40 mlrd 350 mln teńge somasyndaǵy qarjyǵa 15 shekara zastavasyn salýǵa tiis edi. Jumystardy oryndaý merzimi 2023 jyldyń 31 jeltoqsany dep kórsetilgen bolatyn. Jyldyń sońyna deiin 17 kún qaldy.
Alaida joǵaryda kórsetilgen shart boiynsha merzim óreskel buzyldy. Budan basqa, júrgiziletin jumystardyń sapasyna shaǵymdar túsýde. Qolda bar aqparat boiynsha, biyl 1 qazanda «Tolaǵai-2050» kompaniiasy tek 13 mlrd 960 mln teńgeni ǵana igergen.
Bul sharttaǵy jalpy somanyń 35 paiyzy degen sóz. 2022 jyldyń 3-aqpanyna deiin osy kompaniianyń quryltaishylar tiziminde marqum Bolat Nazarbaevtyń qyzy Aqbota Nazarbaeva bolǵanyn atap kórsetemiz.
Másele adamnyń familiiasynda emes. Nazarbaev bolsyn, Bazarbaev bolsyn, zań barshaǵa ortaq bolý kerek», – deidi.
Milliondardyń emes, milliardtardyń áńgimesi...
Bazardyń emes, memlekettik shekara zastavasynyń qarjysy. Nursultan Nazarbaevtyń emes, baýyrynyń aty-jóni belgisiz qyzyna qatysty aqsha. Áńgimeniń tórkini – osynda.
Eski bilik basynan baqaishaǵyna deiin qorlanyp alǵan. Sarymnyń aityp otyrǵany – sol, zań Nazarbaevqa da, Bazarbaevqa da ortaq bolý kerek.
Jylannyń basyn shaýyp tastaý qiyn. Kesirtkedei kertip-kertip kúshin álsiretý – Toqaev diplomatiiasyna ǵana tán jol. Boranbaev pen Satybaldyny dymsyz qaldyrdy. Endigi kezek rámátlik Bolat Nazarbaevqa jetti. Ózi ólgenimen, artyndaǵy bala-shaǵasynyń, toqaldarynyń qolynda zańsyz joldarmen qaldyrǵan bailyǵy. Bolattan keiingi kezek Baibek, Esimov siiaqty týysqandaryna, Ótemuratov siiaqty oń qol, sol qoldaryna jetedi.
Toqaevtiki «Máskeý bir kúnde salynǵan joq» degen diplomatiialyq ustanym. Qytai kórgeni taǵy bar. Hansýlar soǵyssyz-aq Aziianyń jartysyn jaýlap alǵanyn tarih jasyrmaidy
Jaras KEMELJAN
Arnaiy Dalanews úshin
