ونى اۋلەتتىڭ قولىنداعى بايلىق پەن شەتەل اسقان قارجىنى ەلگە قايتارۋ بويىنشا جاسالىپ جاتقان ءبىرقاتار جۇمىستاردان دا ايقىن اڭعارۋعا بولاتىنداي.
DALA INSIDE تەلەگرام ارناسىنا جەتكەن اقپارات بويىنشا توقايەۆ بيلىگى ەسكى قازاقستانمەن كۇرەسكە اۋىر ارتيللەريانى قوسا باستاعان.
ماسەلەن، بۇعان دەيىن اقوردا نازاربايەۆ اۋلەتىنىڭ ىشتەگى بايلىعىن، شەتەلدەگى اكتيۆتەرىن قايتارۋ تۋرالى اڭگىمەلەردىڭ بەتىن ءسۇزىپ، جاڭبىرشين، زايىتوۆ، تولىقباي، ارالباي ۇلى سياقتى ساياسي سالماعى از حايپشىل دەپۋتاتتارعا عانا ايتقىزاتىن.
ەندى بۇل تاقىرىپقا استانا سالماق بەرە باستادى. «تەما» تەرەڭدەگەن.
ۇرىستا تۇرىس جوق
سوعىستىڭ شەشۋشى كەزەڭىنە اقوردا ساياسي سالماعى بار، اۋىر ارتيللەريا سانالاتىن ايدوس سارىمدى ىسكە قوستى. ول بۇرىنعى ايدوس ەمەس، تولىسقان، كەمەلىنە كەلگەن.
قاڭتاردان كەيىنگى ءاۋىس-تۇيىس تۇسىندا حالىقتىڭ سارىمعا دەگەن كوزقاراسىنا قىلاۋ تۇسكەن-دى. 2022 جىلدىڭ قاڭتارىنان بەرگى قازاقستاننىڭ ساياسي يدەولوگياسىن جاساپ، سەنارييىن سىزىپ وتىرعان وسى – ايدوس سارىم.
دەمەك، سارىم، ول – بىرنەشە «زايىتوۆتار» مەن «تولىقبايلاردىڭ» سالماعى بار ساياسي تۇلعا.
سارىمنىڭ جاڭا قازاقستان كۇرەسىنە اشىق تارتىلۋى اشىق مايدان باستالعانىن كورسەتەدى. توقايەۆ بيلىگىنە ەندى ارتقا قايتۋ جوق.
بۇعان دەيىن اقوردا نازاربايەۆ اۋلەتىنىڭ زاڭسىز يەمدەنگەن، شەتەل اسىرعان بايلىقتارىن، ۇرلاعان اكتيۆتەرىن تام-تۇمداپ اشىق اقپارات كوزدەرىنە شىعارا باستاسا، ەندىگى جەردە شىنايى كۇرەس باستالادى.
وعان ناقتى مىسال – ايدوس سارىمنىڭ ءماجىلىس مىنبەرىندە كوتەرگەن تاقىرىبى. دەپۋتات شەكارا زاستاۆالارىن سالۋعا بولىنگەن قارجىنىڭ تالان-تاراجعا ءتۇسۋىن كوتەردى. سيىرقۇيمىشاقتانعان ىستە دە نازاربايەۆ اۋلەتىنىڭ قولتاڭباسى بار...
ايدوس سارىمنىڭ ماجىلىستە كوتەرگەن ماسەلەسى سوزبە-سوز بىلاي: «قازاقستان رەسپۋبليكاسىنىڭ اۋماقتىق قاۋىپسىزدىگىن قامتاماسىز ەتۋ ماقساتىندا 50 شەكارا زاستاۆاسىن سالۋ جوسپارلانعان بولاتىن. 2022 جىلى 20 شەكارا زاستاۆاسىن سالۋ بويىنشا جۇمىستاردى ساتىپ الۋعا تەندەر جاريالاندى.
وعان 53 ملرد 894 ملن تەڭگە شاماسىندا مەردىگەرلىك ۇيىمدار – «Capital Construction» جانە «تولاعاي-2050» كومپانيالارىمەن جالپى شارتتار جاسالعان بولاتىن. وسى شارتتارعا ساي «تولاعاي-2050» كومپانياسى 40 ملرد 350 ملن تەڭگە سوماسىنداعى قارجىعا 15 شەكارا زاستاۆاسىن سالۋعا ءتيىس ەدى. جۇمىستاردى ورىنداۋ مەرزىمى 2023 جىلدىڭ 31 جەلتوقسانى دەپ كورسەتىلگەن بولاتىن. جىلدىڭ سوڭىنا دەيىن 17 كۇن قالدى.
الايدا جوعارىدا كورسەتىلگەن شارت بويىنشا مەرزىم ورەسكەل بۇزىلدى. بۇدان باسقا، جۇرگىزىلەتىن جۇمىستاردىڭ ساپاسىنا شاعىمدار تۇسۋدە. قولدا بار اقپارات بويىنشا، بيىل 1 قازاندا «تولاعاي-2050» كومپانياسى تەك 13 ملرد 960 ملن تەڭگەنى عانا يگەرگەن.
بۇل شارتتاعى جالپى سومانىڭ 35 پايىزى دەگەن ءسوز. 2022 جىلدىڭ 3-اقپانىنا دەيىن وسى كومپانيانىڭ قۇرىلتايشىلار تىزىمىندە مارقۇم بولات نازاربايەۆتىڭ قىزى اقبوتا نازاربايەۆا بولعانىن اتاپ كورسەتەمىز.
ماسەلە ادامنىڭ فاميلياسىندا ەمەس. نازاربايەۆ بولسىن، بازاربايەۆ بولسىن، زاڭ بارشاعا ورتاق بولۋ كەرەك»، – دەيدى.
ميلليونداردىڭ ەمەس، ميللياردتاردىڭ اڭگىمەسى...
بازاردىڭ ەمەس، مەملەكەتتىك شەكارا زاستاۆاسىنىڭ قارجىسى. نۇرسۇلتان نازاربايەۆتىڭ ەمەس، باۋىرىنىڭ ءاتى-جونى بەلگىسىز قىزىنا قاتىستى اقشا. اڭگىمەنىڭ توركىنى – وسىندا.
ەسكى بيلىك باسىنان باقايشاعىنا دەيىن قورلانىپ العان. سارىمنىڭ ايتىپ وتىرعانى – سول، زاڭ نازاربايەۆقا دا، بازاربايەۆقا دا ورتاق بولۋ كەرەك.
جىلاننىڭ باسىن شاۋىپ تاستاۋ قيىن. كەسىرتكەدەي كەرتىپ-كەرتىپ كۇشىن السىرەتۋ – توقايەۆ ديپلوماتياسىنا عانا ءتان جول. بورانبايەۆ پەن ساتىبالدىنى دىمسىز قالدىردى. ەندىگى كەزەك راماتلىك بولات نازاربايەۆقا جەتتى. ءوزى ولگەنىمەن، ارتىنداعى بالا-شاعاسىنىڭ، توقالدارىنىڭ قولىندا زاڭسىز جولدارمەن قالدىرعان بايلىعى. بولاتتان كەيىنگى كەزەك بايبەك، ەسىموۆ سياقتى تۋىسقاندارىنا، وتەمۇراتوۆ سياقتى وڭ قول، سول قولدارىنا جەتەدى.
توقايەۆتىكى «ماسكەۋ ءبىر كۇندە سالىنعان جوق» دەگەن ديپلوماتيالىق ۇستانىم. جۇڭگو كورگەنى تاعى بار. حانسۋلار سوعىسسىز-اق ازيانىڭ جارتىسىن جاۋلاپ العانىن تاريح جاسىرمايدى
جاراس كەمەلجان
ارنايى Dalanews ءۇشىن
