Bir top buzaqynyń qolynan qaza tapqan 16 jastaǵy Sherzat Bolattyń ákesi buqaralyq aqparat quraldarymen kezdesýdi talap etkennen keiin, politsiia qyzmetkerleri ádildik suraǵan Qarjaýbai Nurymovty ustap áketti. Resmi derekte Sherzattyń ákesi qolyna pyshaq ustap, politsiia qyzmetkerlerine shabýyl jasamaq bolǵany jáne óz-ózine qol jumsaimyn dep qorqytqany habarlanǵan. Alaida kýáger bul aqparattyń shyndyqqa janaspaitynyn jetkizdi, dep habarlaidy Dalanews.kz.
Kýáger oqiǵanyń mán-jaiyn Stan.kz agenttigine túsindirip berdi.
“Bireýge pyshaq taqady degenniń barlyǵy ótirik. Ol pyshaqty ózin qorǵaý úshin ǵana ustady. “Eger maǵan jaqyndasańdar, maǵan osy jerde ádil sózdi aitqyzbasańdar qolymdy kesemin, dedi. Eshkimge pyshaq sermegen de taqaǵan da joq. Ol BAQ ókilderin kútip, solarǵa shyndyqty aitamyn dedi. Qarjaýbai aǵaǵa qatysty eshqandai is qozǵalmaýy kerek. Nurqanat baýyrymyz ózine qol jumsady degenge Qarjaýbai aǵa da, men de, búkil qazaq halqy kelispeidi. Ol óziniń baýyry úshin kúresti. Ádildikke qol jetkizgen kezde mundai qadamǵa barmas edi", – deidi kýáger.
Aitýynsha, Qarjaýbai Nurymov tek shyndyqty aitqysy kelgen.
“Men kelgen kezde Qarjaýbai aǵamyz bir kólikti qyspaqqa alypty. Qarjaýbai aǵa kóliktegi adamdy shyǵarmaq bolǵan, alaida ol shyqpai qoiǵan. Kólikpen jolyn bógegennen keiin týystarynyń barlyǵy sol jerge jinaldy. Ol jerge barlyq quqyq qorqaý organdary keldi. Qarjaýbai aǵanyń bir ǵana talaby boldy. Ol – ádil tergeý. Jańaǵy adamdy shyǵaryp, sol jerde tergeý júrgizýdi talap etti. Óitkni Nurqanattyń denesin tapqanda sol adam kórgen degen kúdik bar. Qarjaýbai aǵa tek shyndyqty aitqysy keldi. Eshqandai mitingige úgittegen joq. Sol jerde turyp, “Maǵan tek ádildik kerek” dedi”, – deidi Dinmuhamed Qamatai Stan.kz-ke.
Onyń sózinshe, marqum Nurqanat kózi tirisinde tek aýdiohabarlama qoldanǵan. Sondai-aq óte saýatty jazatyn bolǵan.
“Qalai bir ýaqytta birneshe adamǵa habarlama jiberedi. Ol árdaiym aýdohabarlama jiberedi eken. Jai ǵana hat jazyp kete salýy múmkin emes. Sonymen qatar Nurqanat qatesiz jazatyn. Meniń oiymsha habarlamalardy Nurqanat jazbaǵan”, – deidi ol.
Aita keteiik, keshe marqum Sherzat Bolattyń otbasy Nurqanat Ǵaiypbaevty jer qoinyna tapsyrǵannan keiin, Qarjaýbai Nurymov qolyna pyshaq ustap, BAQ ókilderimen kezdesýdi talap etti. Atalǵan oqiǵadan keiin Nurymovty politsiia qyzmetkerleri ustap áketti.
Resmi derekke súiensek, saǵat 15:30 shamasynda Azat aýylynda jerleý rásimi kezinde qoǵamdyq tártip buzylǵan. Aitýlarynsha, Qarjaýbai Nurymov qolyna pyshaq ustap, óz-ózine qol jumsamaq bolǵan.
"Qarjaýbai Nurymov prokýrordyń zańdy saqtaý týraly túsindirmelerin elemedi. Shekten tys agressivti minez-qulyq tanytyp, basqalardy óz-ózine qol jumsaimyn dep qorqytty. Sonymen qatar politsiia qyzmetkerine pyshaqpen shabýyl jasady. Onyń minez-qulqy ózine de, basqalarǵa da qaýip tóndirdi", — delingen habarlamada.
Osylaisha Sherzat Bolattyń ákesi men ápkesi qamaýǵa alyndy.
Eńbekshiqazaq aýdandyq soty ákimshilik is júrgizý tártibimen isterdi qaraý nátijeleri boiynsha azamat S. Nurymova usaq buzaqylyq jasaǵany úshin (ÁQBtK 434-babynyń 1-bóligi) 20 AEK mólsherinde aiyppul salýmen ákimshilik jaýapkershilikke tartyldy.
QR beibit jinalystardy uiymdastyrý jáne ótkizý tártibi týraly zańnamasyn buzǵany úshin (ÁQBtK 488- babynyń 8-bólimi.) azamattyǵy joq adam jasaǵan, azamatsha B. Reimova ákimshilik tártippen 15 táýlikke qamaýǵa alynyp, keiinnen QR sheginen shyǵaryp jiberildi.
Qoǵamdyq orynda balaǵat sózder aitqany, quqyq qorǵaý organdarynyń qyzmetkerlerin qorlap, sondai-aq qoǵamdyq tártip pen azamattardyń tynyshtyǵyn buzatyn ainalasyndaǵylarǵa qurmetsizdik tanytatyn is-áreketter jasaǵany jáne kólik quraldarynyń qozǵalysy úshin kedergiler jasaǵany úshin Qarjaýbai Nurymov 15 táýlikke ákimshilik qamaýǵa alyndy.
