ءبىر توپ بۇزاقىنىڭ قولىنان قازا تاپقان 16 جاستاعى شەرزات بولاتتىڭ اكەسى بۇقارالىق اقپارات قۇرالدارىمەن كەزدەسۋدى تالاپ ەتكەننەن كەيىن، پوليسيا قىزمەتكەرلەرى ادىلدىك سۇراعان قارجاۋباي نۇرىموۆتى ۇستاپ اكەتتى. رەسمي دەرەكتە شەرزاتتىڭ اكەسى قولىنا پىشاق ۇستاپ، پوليسيا قىزمەتكەرلەرىنە شابۋىل جاساماق بولعانى جانە وز-وزىنە قول جۇمسايمىن دەپ قورقىتقانى حابارلانعان. الايدا كۋاگەر بۇل اقپاراتتىڭ شىندىققا جاناسپايتىنىن جەتكىزدى، دەپ حابارلايدى Dalanews.kz.
كۋاگەر وقيعانىڭ ءمان-جايىن Stan.kz اگەنتتىگىنە ءتۇسىندىرىپ بەردى.
“بىرەۋگە پىشاق تاقادى دەگەننىڭ بارلىعى وتىرىك. ول پىشاقتى ءوزىن قورعاۋ ءۇشىن عانا ۇستادى. “ەگەر ماعان جاقىنداساڭدار، ماعان وسى جەردە ءادىل ءسوزدى ايتقىزباساڭدار قولىمدى كەسەمىن، دەدى. ەشكىمگە پىشاق سەرمەگەن دە تاقاعان دا جوق. ول ب ا ق وكىلدەرىن كۇتىپ، سولارعا شىندىقتى ايتامىن دەدى. قارجاۋباي اعاعا قاتىستى ەشقانداي ءىس قوزعالماۋى كەرەك. نۇرقانات باۋىرىمىز وزىنە قول جۇمسادى دەگەنگە قارجاۋباي اعا دا، مەن دە، بۇكىل قازاق حالقى كەلىسپەيدى. ول ءوزىنىڭ باۋىرى ءۇشىن كۇرەستى. ادىلدىككە قول جەتكىزگەن كەزدە مۇنداي قادامعا بارماس ەدى"، – دەيدى كۋاگەر.
ايتۋىنشا، قارجاۋباي نۇرىموۆ تەك شىندىقتى ايتقىسى كەلگەن.
“مەن كەلگەن كەزدە قارجاۋباي اعامىز ءبىر كولىكتى قىسپاققا الىپتى. قارجاۋباي اعا كولىكتەگى ادامدى شىعارماق بولعان، الايدا ول شىقپاي قويعان. كولىكپەن جولىن بوگەگەننەن كەيىن تۋىستارىنىڭ بارلىعى سول جەرگە جينالدى. ول جەرگە بارلىق قۇقىق قورقاۋ ورگاندارى كەلدى. قارجاۋباي اعانىڭ ءبىر عانا تالابى بولدى. ول – ءادىل تەرگەۋ. جاڭاعى ادامدى شىعارىپ، سول جەردە تەرگەۋ جۇرگىزۋدى تالاپ ەتتى. ويتكنى نۇرقاناتتىڭ دەنەسىن تاپقاندا سول ادام كورگەن دەگەن كۇدىك بار. قارجاۋباي اعا تەك شىندىقتى ايتقىسى كەلدى. ەشقانداي ميتينگىگە ۇگىتتەگەن جوق. سول جەردە تۇرىپ، “ماعان تەك ادىلدىك كەرەك” دەدى”، – دەيدى دىنمۇحامەد قاماتاي Stan.kz-كە.
ونىڭ سوزىنشە، مارقۇم نۇرقانات كوزى تىرىسىندە تەك اۋديوحابارلاما قولدانعان. سونداي-اق وتە ساۋاتتى جازاتىن بولعان.
“قالاي ءبىر ۋاقىتتا بىرنەشە ادامعا حابارلاما جىبەرەدى. ول ءاردايىم اۋدوحابارلاما جىبەرەدى ەكەن. جاي عانا حات جازىپ كەتە سالۋى مۇمكىن ەمەس. سونىمەن قاتار نۇرقانات قاتەسىز جازاتىن. مەنىڭ ويىمشا حابارلامالاردى نۇرقانات جازباعان”، – دەيدى ول.
ايتا كەتەيىك، كەشە مارقۇم شەرزات بولاتتىڭ وتباسى نۇرقانات عايىپبايەۆتى جەر قوينىنا تاپسىرعاننان كەيىن، قارجاۋباي نۇرىموۆ قولىنا پىشاق ۇستاپ، ب ا ق وكىلدەرىمەن كەزدەسۋدى تالاپ ەتتى. اتالعان وقيعادان كەيىن نۇرىموۆتى پوليسيا قىزمەتكەرلەرى ۇستاپ اكەتتى.
رەسمي دەرەككە سۇيەنسەك، ساعات 15:30 شاماسىندا ازات اۋىلىندا جەرلەۋ ءراسىمى كەزىندە قوعامدىق ءتارتىپ بۇزىلعان. ايتۋلارىنشا، قارجاۋباي نۇرىموۆ قولىنا پىشاق ۇستاپ، وز-وزىنە قول جۇمساماق بولعان.
"قارجاۋباي نۇرىموۆ پروكۋروردىڭ زاڭدى ساقتاۋ تۋرالى تۇسىندىرمەلەرىن ەلەمەدى. شەكتەن تىس اگرەسسيۆتى مىنەز-قۇلىق تانىتىپ، باسقالاردى وز-وزىنە قول جۇمسايمىن دەپ قورقىتتى. سونىمەن قاتار پوليسيا قىزمەتكەرىنە پىشاقپەن شابۋىل جاسادى. ونىڭ مىنەز-قۇلقى وزىنە دە، باسقالارعا دا ءقاۋىپ ءتوندىردى"، — دەلىنگەن حابارلامادا.
وسىلايشا شەرزات بولاتتىڭ اكەسى مەن اپكەسى قاماۋعا الىندى.
ەڭبەكشىقازاق اۋداندىق سوتى اكىمشىلىك ءىس جۇرگىزۋ تارتىبىمەن ىستەردى قاراۋ ناتيجەلەرى بويىنشا ازامات س. نۇرىموۆا ۇساق بۇزاقىلىق جاساعانى ءۇشىن (اقبتك 434-بابىنىڭ 1-بولىگى) 20 اەك مولشەرىندە ايىپپۇل سالۋمەن اكىمشىلىك جاۋاپكەرشىلىككە تارتىلدى.
ق ر بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى زاڭناماسىن بۇزعانى ءۇشىن (اقبتك 488- بابىنىڭ 8ء-بولىمى.) ازاماتتىعى جوق ادام جاساعان، ازاماتشا ب. رەيموۆا اكىمشىلىك تارتىپپەن 15 تاۋلىككە قاماۋعا الىنىپ، كەيىننەن ق ر شەگىنەن شىعارىپ جىبەرىلدى.
قوعامدىق ورىندا بالاعات سوزدەر ايتقانى، قۇقىق قورعاۋ ورگاندارىنىڭ قىزمەتكەرلەرىن قورلاپ، سونداي-اق قوعامدىق ءتارتىپ پەن ازاماتتاردىڭ تىنىشتىعىن بۇزاتىن اينالاسىنداعىلارعا قۇرمەتسىزدىك تانىتاتىن ىس-ارەكەتتەر جاساعانى جانە كولىك قۇرالدارىنىڭ قوزعالىسى ءۇشىن كەدەرگىلەر جاساعانى ءۇشىن قارجاۋباي نۇرىموۆ 15 تاۋلىككە اكىمشىلىك قاماۋعا الىندى.
