Dástúrli ánshi, ónertanýshy, akter Erlan Tóleýtai Djeki Channyń Qazaqstanǵa kelýine bailanysty memlekettik deńgeide kórsetilgen qurmetti synǵa alyp, biýdjet qarajaty eń aldymen ulttyq kino men mádenietke baǵyttalýy tiis ekenin málimdedi, dep habarlaidy dalanews.kz.
Erlan Tóleýtaidyń aitýynsha, álemge tanymal akterdiń kelýi shoý-biznes aiasyndaǵy oqiǵa bolǵandyqtan, ony memlekettik deńgeidegi másele retinde qarastyrý durys emes.
«Vitse-premer de sońynan júr. Ákim de qarsy alady. Biraq Djeki Chan basqa memlekettiń azamaty. Ol memlekettik kinoǵa qatyspaidy. Bul shoý indýstriiasynyń ókili. Ondai adamdarmen kino salasynyń mamandary jumys isteýi kerek. Memlekettik deńgeide soǵan sonsha kóńil bóletindei jaǵdaida emespiz», - dedi ol.
Onyń pikirinshe, mundai áreketter qoǵamda keri pikir qalyptastyryp, jurtshylyqtyń «ózimizdiń óner adamdary qaida qaldy?» degen zańdy saýalyn týyndatady.
«Halyq “bizdiń óz akterlerimiz qaida?”, “ulttyq ónerge kim kóńil bóledi?” dep suraidy. Keshe de áleýmettik jelide osy másele kóterildi. Eń aldymen ulttyq ónerge qyzmet etetin azamattarǵa qoldaý kórsetilýi kerek», - dedi Erlan Tóleýtai.
Ol sondai-aq Djeki Chan qatysatyn filmge bólinetin qarjy kólemine qatysty da pikir bildirdi.
«Bir filmniń biýdjeti 40 million dollar deidi. Taǵy bir jerde 60 million dollar degen aqparat aitylyp jatyr. Osynsha qarjyǵa elimizde 50-60 kórkem film túsirýge bolady. Sonda bizdiń el ne oilap otyr?» - dedi ol.
Erlan Tóleýtaidyń aitýynsha, jobaǵa qarjy Qazaqstan tarapynan bólinse, bul qarajattyń qaidan alynǵanyna qoǵam nazar aýdarýy kerek.
«Qarjyny Kaspi bank beredi deidi. Biraq ol qazaqtyń banki. Amerikadan kelip jatqan aqsha emes. Bul halyqtyń aqshasy. Sondyqtan onyń qazaq qoǵamyna qandai naqty paida ákeletinin túsinýimiz kerek», - dedi akter.
Onyń pikirinshe, sheteldik akterdiń Qazaqstanda filmge túsýi ulttyq mádenietti halyqaralyq deńgeide tanytady degen pikir de asyra baǵalanýda.
«Djeki Channyń bul filmge túsýi qazaqtyń dańqyn shyǵarady deýge bolmaidy. Filmdi belgisiz rejisser túsirip jatyr. Onyń qandai nátije beretinin eshkim bilmeidi. Al bizde ulttyq kinoǵa qarjy jetpeidi deidi, ulttyq ónerge aqsha joq deidi. Kitap shyǵaraiyn deseń de qoldaý tappaisyń. Eń aldymen qazaq qoǵamyna kerek dúnielerge kóńil bólinýi tiis. Jastarymyz ulttyq ónermen tárbielenýi kerek», - dep túiindedi Erlan Tóleýtai.
