Qazaqstan Respýblikasynyń Memlekettik keńesshisi Erlan Qarin Qazaqstan ishki jáne syrtqy saiasatyn bireýge unaý úshin júrgizbeitinin aitty, - dep habarlaidy Dalanews.kz.
Elimiz Táýelsizdigin jariialap, shekarasyn shegendep, memlekettik institýttary men zańnamalyq bazasyn qalyptastyrǵannan keiin ulttyń saiasi missiiasy aiaqtaldy dep sanaityndar bar. Bul – túbirimen jańsaq pikir. Aldymyzda qasterli táýelsizdigimizdi qorǵaý, memleketimizdi damytyp, ony qýatty elge ainaldyrý, sondai-aq halyqtyń ál-aýqatyn arttyrý sekildi mańyzdy mindetter tur.
Biregeiligimizdi jáne ózindik ómir saltymyzdy saqtaý – ishki saiasatymyzdyń kún tártibinde turǵan basty mindet. Bul – bizdi basqa elderden, basqa halyqtar men basqa mádenietterden erekshelep turatyn qundylyqtar, iaǵni jurtymyzdyń tamyry tereń shejiresi, kóp ultty, kóp tildi sipaty, dini toleranttylyǵy jáne mádenietimizdiń ár alýandyǵy, bir-birimizben til tabysa bilýimiz, ózara qoldaý kórsetýimiz jáne yrysty yntymaǵymyz. Osynyń bári tutasa kelgende, Qazaqstannyń ómir saltyn tanytady. Bir sózben aitsaq, biz ozyq oily ult retinde árdaiym strategiialyq baǵdarymyzdy berik ustanyp, ulttyq múddemiz ben ómir saltymyzdy dáiekti ári tabandy túrde qorǵaýymyz kerek.
Biz syrttan keletin arandatýshylarǵa ilesip, jat aqparat pen ideologiianyń jeteginde ketpegenimiz jón. Ishki saiasatta tek ózimizdiń kún tártibimizdi basshylyqqa alýymyz qajet. Bul – bireýge nemese birdeńege qarsylyqtyń emes, kerisinshe, igilik pen yrystyń joly. Bizdiń ishki kún tártibimiz jasampazdyqqa negizdelgen, ol jańa qoǵam qurýdy, jan-jaqty jańǵyrýdy jáne reformalar júrgizý maqsatyn kózdeidi.
Memleket basshysy Qasym-Jomart Toqaev elimizdiń óz ustanymdaryn jáne ulttyq múddesin bárinen biik qoiýy qajettigin birneshe márte atap ótti. Máselen, jýyrda Singapýrǵa sapary kezinde arnaiy dáris oqyp, bizdiń búkil álemmen ózara yntymaqtastyq ornatýǵa ashyq ekenimizdi, biraq Qazaqstannyń zańdy quqyqtary men múddesin qorǵaýǵa kelgende eshqashan qarap qalmaitynymyzdy qadap aitty. Prezident elimizdiń beitarap ustanymy qaqtyǵys pen májbúrleýdi emes, diplomatiia men dialogti jaqtaityn sanaly tańdaý ekenin atap ótti.
Qazaqstan ishki jáne syrtqy saiasatyn bireýge unaý úshin nemese qandai da bir úrdiske ilesý úshin júrgizbeidi. Biz, eń áýeli, ult múddesin, tól ustanymdarymyzdy basshylyqqa alamyz. Jahandyq saiasatta kóńilshektik pen ańǵaldyqqa jol berýge áste bolmaidy. Kóp vektorly nemese beitarap saiasat júrgizý ońai ári yńǵaily degen pikir bar. Bul shyndyqqa janaspaityn diletanttyq tujyrym deýge bolady. Qazaqstan kóp vektorly, saliqaly saiasat júrgizip otyr. Mundai saiasat ustaný, ásirese jer júzi san tarapqa bólingen qazirgi kezeńde óte qiyn jáne orasan zor kúsh-jigerdi talap edi.
Osyndai saiasat júrgizý ońai emes ekeni anyq. Biraq geosaiasi ornymyzdy eskersek jáne elimizdiń múddesin oilasaq, budan basqa jol joq. Sondyqtan qazirgidei qiyn kezde ulttyq múddemizdi qorǵap, óz ustanymdarymyzdy saqtaý úshin el birligin jáne qoǵamnyń tutastyǵyn nyǵaita túsý airyqsha mańyzdy.
