Jańa Konstitýtsiia jobasynda tuńǵysh ret myńjyldyq tarihymyz basty qundylyq retinde jazyldy. Bul týraly Memlekettik keńesshi Erlan Qarin Konstitýtsiialyq reformalar jónindegi komissiianyń VII otyrysynda aitty, dep habarlaidy Dalanews.kz.
Onyń sózinshe, qazirgi qoldanystaǵy 1995 jylǵy Konstitýtsiiada tarih týraly bir de bir sóz joq.
«Jańa Konstitýtsiia jobasynyń Preambýlasyndaǵy «Uly Dalanyń myńjyldyq tarihynyń sabaqtastyǵyn saqtai otyryp» degen sóilem tarihymyzdyń úzdiksiz sabaqtastyǵyn, Qazaqstan kóshpeliler órkenietiniń oshaǵy ekenin aiǵaqtaidy. Osylaisha, tarihymyz Konstitýtsiiada tuńǵysh ret deklaratsiia emes, memlekettik qundylyq retinde bekitilip otyr», – dedi Erlan Qarin.
Preambýladaǵy «Uly Dala» men «myńjyldyq tarih» uǵymdary Qazaqstannyń tarihi sýbekt ekenin aiǵaqtaityn ári memlekettik biregeilikti aiqyndaityn uǵymdar.
Sonymen birge, Memlekettik keńesshi jańa Konstitýtsiiada memlekettik til – qazaq tili ekeni taiǵa tańba basqandai naqty jazylǵanyna da toqtaldy.
«Atap aitqanda, 9-baptyń 1-tarmaǵynda «Qazaqstan Respýblikasynyń memlekettik tili – qazaq tili» dep anyq kórsetilgen. Iaǵni, bizde memlekettik til bireý, ol – qazaq tili. Basqa memlekettik til joq. Tilimiz biik tuǵyrda, óz ornynda. Memleketimiz barda sol tuǵyrdan eshqashan tómen túspeidi. Ol úshin osy memleketti saqtaýymyz kerek, qorǵaýymyz qajet. Eldiń birligin oilaýymyz kerek», – dep atap ótti Erlan Qarin.
Sondai-aq, ol jańa Konstitýtsiia jobasy men 1995 jyly qabyldanǵan qoldanystaǵy Ata Zańda aiyrmashylyq óte kóp ekenin jetkizdi.
«Jańa Konstitýtsiia jobasy – jarty jyldan astam ýaqyt boiy el azamattarynan, sarapshylardan, qoǵam belsendilerinen, túrli uiymdardan kelip túsken usynystar men bastamalardyń nátijesi, osy kúnge deiin júrgizilgen túrli uzaq talqylaýlardyń jemisi», – dedi Erlan Qarin.
