جاڭا كونستيتۋتسييا جوباسىندا تۇڭعىش رەت مىڭجىلدىق تاريحىمىز باستى قۇندىلىق رەتٸندە جازىلدى. بۇل تۋرالى مەملەكەتتٸك كەڭەسشٸ ەرلان قارين كونستيتۋتسييالىق رەفورمالار جٶنٸندەگٸ كوميسسييانىڭ VII وتىرىسىندا ايتتى, دەپ حابارلايدى Dalanews.kz.
ونىڭ سٶزٸنشە, قازٸرگٸ قولدانىستاعى 1995 جىلعى كونستيتۋتسييادا تاريح تۋرالى بٸر دە بٸر سٶز جوق.
«جاڭا كونستيتۋتسييا جوباسىنىڭ پرەامبۋلاسىنداعى «ۇلى دالانىڭ مىڭجىلدىق تاريحىنىڭ ساباقتاستىعىن ساقتاي وتىرىپ» دەگەن سٶيلەم تاريحىمىزدىڭ ٷزدٸكسٸز ساباقتاستىعىن, قازاقستان كٶشپەلٸلەر ٶركەنيەتٸنٸڭ وشاعى ەكەنٸن ايعاقتايدى. وسىلايشا, تاريحىمىز كونستيتۋتسييادا تۇڭعىش رەت دەكلاراتسييا ەمەس, مەملەكەتتٸك قۇندىلىق رەتٸندە بەكٸتٸلٸپ وتىر», – دەدٸ ەرلان قارين.
پرەامبۋلاداعى «ۇلى دالا» مەن «مىڭجىلدىق تاريح» ۇعىمدارى قازاقستاننىڭ تاريحي سۋبەكت ەكەنٸن ايعاقتايتىن ەرٸ مەملەكەتتٸك بٸرەگەيلٸكتٸ ايقىندايتىن ۇعىمدار.
سونىمەن بٸرگە, مەملەكەتتٸك كەڭەسشٸ جاڭا كونستيتۋتسييادا مەملەكەتتٸك تٸل – قازاق تٸلٸ ەكەنٸ تايعا تاڭبا باسقانداي ناقتى جازىلعانىنا دا توقتالدى.
«اتاپ ايتقاندا, 9-باپتىڭ 1-تارماعىندا «قازاقستان رەسپۋبليكاسىنىڭ مەملەكەتتٸك تٸلٸ – قازاق تٸلٸ» دەپ انىق كٶرسەتٸلگەن. ياعني, بٸزدە مەملەكەتتٸك تٸل بٸرەۋ, ول – قازاق تٸلٸ. باسقا مەملەكەتتٸك تٸل جوق. تٸلٸمٸز بيٸك تۇعىردا, ٶز ورنىندا. مەملەكەتٸمٸز باردا سول تۇعىردان ەشقاشان تٶمەن تٷسپەيدٸ. ول ٷشٸن وسى مەملەكەتتٸ ساقتاۋىمىز كەرەك, قورعاۋىمىز قاجەت. ەلدٸڭ بٸرلٸگٸن ويلاۋىمىز كەرەك», – دەپ اتاپ ٶتتٸ ەرلان قارين.
سونداي-اق, ول جاڭا كونستيتۋتسييا جوباسى مەن 1995 جىلى قابىلدانعان قولدانىستاعى اتا زاڭدا ايىرماشىلىق ٶتە كٶپ ەكەنٸن جەتكٸزدٸ.
«جاڭا كونستيتۋتسييا جوباسى – جارتى جىلدان استام ۋاقىت بويى ەل ازاماتتارىنان, ساراپشىلاردان, قوعام بەلسەندٸلەرٸنەن, تٷرلٸ ۇيىمداردان كەلٸپ تٷسكەن ۇسىنىستار مەن باستامالاردىڭ نەتيجەسٸ, وسى كٷنگە دەيٸن جٷرگٸزٸلگەن تٷرلٸ ۇزاق تالقىلاۋلاردىڭ جەمٸسٸ», – دەدٸ ەرلان قارين.
