Áskerde júrgen kezinde aýyr bas-mi jaraqatyn alǵan Erbaian Muhtardyń qazirgi jaǵdaiy belgili boldy, dep habarlaidy Dalanews.kz.
“Búgin Erbaian Stambýldan oralǵannan keiingi saýyqtyrý jumystarynyń bastalǵanyna týra 4,5 ai toldy. Baiaý bolsa da, turaqty túrde alǵa ilgerileýdi baiqap otyrmyn”, – deidi massajist Ulpan Sovetbekova.
Onyń aitýynsha, Erbaian qazirgi ýaqytta arqasyn tik ustap, aiaǵynda tura alady, moiyn qozǵalysyn baqylaidy. Sonymen qatar sol jaq qol-aiaǵynda reaktsiialar paida bolyp, salmaq qosqan. Eń bastysy – aýyz qýysymen tolyqqandy jumys istei alatyn jaǵdaiǵa jetken.
“Bul bastyń aýyr operatsiiasynan keiin nebári 7,5 ai ishinde qol jetkizilgen óte jaqsy nátije”, – dep atap ótti Sovetbekova.
Mamannyń aitýynsha, mundai jaǵdaidaǵy ońaltý protsesi baiaý júrgenimen, turaqtylyǵy erekshe mańyzdy. Erbaiandy alda saýyqtyrýdyń ekinshi kezeńi – Stambýlǵa qaita sapar kútip tur.
“Men alǵashqy kúnnen beri senemin: tolyq qalpyna kelýge az ǵana qaldy”, – dedi massajist.
Ulpan Sovetbekova barsha jurttan Erbaiannyń saýyǵýy úshin duǵa tilep, qoldaý kórsetýdi surady.
“Ol bárin sezip, bárin túsinip otyr. Sizderdiń qoldaýlaryńyz biz úshin óte mańyzdy”, – deidi ol.
Aita keteiik, Erbaian Muhtar 2024 jyly jeltoqsanda aýrýhanaǵa tústi. Ulttyq ulannyń áskeri bólimindegiler ata-anasyna onyń ájethanada qulap, basyn soqqanyn aitqan. Alaida olar bul nusqaǵa senbei, Erbaian soqqyǵa jyǵylǵanyn dáleldeýge tyrysty.
Qazaqstandyqtar jas sarbazdyń emine 230 million teńge kóleminde qarajat jinady. Qazir Erbaian Muhtar Astanada, ol Túrkiiada emniń alǵashqy kezeńin aiaqtady.
Jýyrda bas áskeri prokýrordyń birinshi orynbasary Maqsat Qaziev tergeý qalai júrip jatqanyn aitty. Prokýratýra ókili naqty kúdiktiler joq ekenin de jetkizdi.
