اسكەردە جۇرگەن كەزىندە اۋىر باس-مي جاراقاتىن العان ەربايان مۇحتاردىڭ قازىرگى جاعدايى بەلگىلى بولدى، دەپ حابارلايدى Dalanews.kz.

“بۇگىن ەربايان ستامبۋلدان ورالعاننان كەيىنگى ساۋىقتىرۋ جۇمىستارىنىڭ باستالعانىنا تۋرا 4،5 اي تولدى. باياۋ بولسا دا، تۇراقتى تۇردە العا ىلگەرىلەۋدى بايقاپ وتىرمىن”، – دەيدى ماسساجيست ۇلپان سوۆەتبەكوۆا.

ونىڭ ايتۋىنشا، ەربايان قازىرگى ۋاقىتتا ارقاسىن تىك ۇستاپ، اياعىندا تۇرا الادى، مويىن قوزعالىسىن باقىلايدى. سونىمەن قاتار سول جاق قول-اياعىندا رەاكسيالار پايدا بولىپ، سالماق قوسقان. ەڭ باستىسى – اۋىز قۋىسىمەن تولىققاندى جۇمىس ىستەي الاتىن جاعدايعا جەتكەن.

“بۇل باستىڭ اۋىر وپەراسياسىنان كەيىن نەبارى 7،5 اي ىشىندە قول جەتكىزىلگەن وتە جاقسى ناتيجە”، – دەپ اتاپ ءوتتى سوۆەتبەكوۆا.

ماماننىڭ ايتۋىنشا، مۇنداي جاعدايداعى وڭالتۋ پروسەسى باياۋ جۇرگەنىمەن، تۇراقتىلىعى ەرەكشە ماڭىزدى. ەرباياندى الدا ساۋىقتىرۋدىڭ ەكىنشى كەزەڭى – ستامبۋلعا قايتا ساپار كۇتىپ تۇر.

“مەن العاشقى كۇننەن بەرى سەنەمىن: تولىق قالپىنا كەلۋگە از عانا قالدى”، – دەدى ماسساجيست.

ۇلپان سوۆەتبەكوۆا بارشا جۇرتتان ەرباياننىڭ ساۋىعۋى ءۇشىن دۇعا تىلەپ، قولداۋ كورسەتۋدى سۇرادى.

“ول ءبارىن سەزىپ، ءبارىن ءتۇسىنىپ وتىر. سىزدەردىڭ قولداۋلارىڭىز ءبىز ءۇشىن وتە ماڭىزدى”، – دەيدى ول.

ايتا كەتەيىك، ەربايان مۇحتار 2024 جىلى جەلتوقساندا اۋرۋحاناعا ءتۇستى. ۇلتتىق ۇلاننىڭ اسكەري بولىمىندەگىلەر اتا-اناسىنا ونىڭ اجەتحانادا قۇلاپ، باسىن سوققانىن ايتقان. الايدا ولار بۇل نۇسقاعا سەنبەي، ەربايان سوققىعا جىعىلعانىن دالەلدەۋگە تىرىستى.

قازاقستاندىقتار جاس ساربازدىڭ ەمىنە 230 ميلليون تەڭگە كولەمىندە قاراجات جينادى. ءقازىر ەربايان مۇحتار استانادا، ول تۇركيادا ەمنىڭ العاشقى كەزەڭىن اياقتادى.

جۋىردا باس اسكەري پروكۋروردىڭ ءبىرىنشى ورىنباسارى ماقسات قازييەۆ تەرگەۋ قالاي ءجۇرىپ جاتقانىن ايتتى. پروكۋراتۋرا وكىلى ناقتى كۇدىكتىلەر جوق ەكەنىن دە جەتكىزدى.