Jaqynda kórshimniń balasy úilenip, toiynda boldyq. Eki jastyń qýanyshy úshin ishpesime qoiarda qoimai bir-eki ret júz gramm tartqyzyp jiberdi. Ishke ashy sýdyń bir-ekeýi ketkennen keiin qalǵany ózinen-ózi tarata bastaityny belgili ǵoi.
Budan keiin ainalamdaǵy jurttan qalmai, tanysymnyń qýanyshyna "ot dýshi" ortaqtasyp, aqtan alyp otyrdym. Qasymda otyrǵan kelinshegim sannan shymshyp, búiirden túrtkenin de eleń qylǵanym joq. Ózim sekildi er azamattar da qamshy saldyrmai alyp otyrǵanda men qalai tizgin tartaiyn? Sondyqtan kelinshegiminiń eskertýine qaperge almadym. Barlyqtaryńyzdyń bastaryńyzdan ótken jait shyǵar?
Onyń ústine iship masaiǵanda eshkimmen bailanysyp, daý shyǵaryp, tóbelespeitinim ózime málim. Keibireýler ishine ot barǵannan keiin ár sózińnen ilik izdep, urynarǵa qara tappai otyrady emes pe? Men ondai jandardyń qatarynan emespin. Qaita kerisinshe ishsem beibitsúigish janǵa ainalyp shyǵa kelemin.
Árkimge eljirep, betime kúlimdei qaraǵan adammen qolymdaǵy barymdy bólisýge daiar turamyn. Eger AQSh prezidenti Donald Tramp, Soltústik Koreianyń basshysy Kim Chen Yn úsheýmiz ǵaiyptan taiyp ishe qalsaq, ekeýine araǵaiyn bolyp, it pen mysyqtai bolǵan eki myqtyny taýtýlastyryp jiberer edim. Biraq maǵan ondai múmkindikti kim bersin?
Iá, men iship alsam, kóńildenip, adam balasyna eljirep, jurttan artyq qýanyp, "qýyp ketetin" (kelinshegim meniń bul qasietimdi osylai baǵalaidy) ádetim bar.
Kórshimniń toiy jaqsy ótip jatty. Taýdai et, kóldei sorpa degendei. Stoldyń beli qaiysyp tur. Salattyń neshe túri. Sýsyn, sharap, tátti... Dóńgelek ústeldi jaǵalai otyrǵan aýyldastarymen yrjiyp, toptasyp, sýretke de túsip aldym. Ár sýretin bazardyń baǵasynan on ese artyq satatyn bala da meni ainalsoqtap, qasymnan shyǵar emes. Amal ne qaltama salyp shyqqan bes myń teńgeniń bári sýretke ketti.
Sýretti eki-úsheýden túsip, qasymdaǵy qasymdaǵylarǵa da úlestirip, myrzalyq tanyttym. Kelinshegim bir qaraǵanymda aqshany ońdy-soldy shashqanym unatpai, keiistik tanytyp otyrǵanyn baiqap, dereý júzimdi taidyryp ákettim.
Mine, jurt dúrkirep bige shyqty. Tóreshtiń álgi bir qandy qyzdyratyn áni oryndalǵanda qalai shydaisyń, qasymda otyrǵan topty bastap bi alańyna alyp shyqtym. Bul kezde ózim otyrǵan 12 ústeldi tolyqtai bilep, tóstep alǵan edim. Qudy bir dóńgelek ústeldi jaǵalai otyrǵan bizdiń kósheniń turǵyndaryn soǵysqa bastasam da "qaida baramyz" demesten sońymnan erip júre beretin jaǵdaida edi.
Jalpy adam ishken kezde bishi bolyp ketedi ǵoi. Basqany qaidan ózim solai sezinemin. Oinaqy áýenniń yrǵaǵynda kermet bi qimyldaryn... salyp jurttyń yqylasyna bólenip jatqanymdy sezip... (buǵan imanym kámil edi) turamyn.
Bizdiń toidyń didjeileri de myqty ǵoi. Bir ret bige shyqqan adamdy ústel basyna qaitarmai, birazǵa deiin biletetin qudireti bar. Tóreshten keiin Qairoshtyń (bizdiń aýyldy Qairat Nurtasty solai ataidy) ánin jiberdi. Bizdiń aýyldyń turǵyndary "Tóreshtiń ánine biledik, Qairoshtyń ánine bilmesek uiat bolar" dep qalyptasqan daǵdyny buzbai jer tarpyp ádemi... biin údete tústi.
Telearnadan kórgen bishilerdiń dene qimylyn barynsha salyp jatqanymdy bilemin. Kózimdi jumǵanda bi alańynda "Qara jorǵa" men "Lambadanyń" kýlminatsiialyq iirim, qaiyrymdaryn ushtastyryp, bidiń jańa surapyl baǵytyn qalyptastyryp jatqandai sezindim.
Al álgi Erke qyzdyń "Astanada joq, joq" degen (bul án solai atalýshy ma edi?) áni qoiylǵanda saltanat saraiy jarylardai boldy. Bul kezde toi iesiniń Astanadan kelgen qudashalaryn bige shaqyryp, ǵajaiyp bi keshiniń jańa bir kezeńine aiaq basqan edik. Astanadan kelgen qudasha da myqty eken burańdap bilegende adamnyń shabytyn oiata ma, qalai?.. Bizdiń aýyldyń kelinshekteri keń etek kóilekterin jelpildetip bilegenine máz bolýshy edim. Al myna qudashanyń (tanysqan edik, aty esimde joq) bii zaman aǵymyna sai, áýen yrǵaǵyna úilesimdi, adamnyń jan-júregin eljiretetin bir siyqyry bar sekildi...
Toidyń qaitalanbas sátterin taspalap júrgen operator da bizdiń biimizdi ár túrli rakýsta túsirip, jan tappai júr. Budan basqa qolynda smartfony barlarda bizdiń biimizdi... jan-jaqtan japatarmaǵai túsirip, máre-sáre bolǵanyn bilemin. Tek kelinshegim ǵana renishpen qarap turǵanyn baiqap qaldym.
Sol kezde qudashamen qatty bilep, súiip qosylǵan jarymnyń kóńiline qaiaý túsirip aldym ba degen oi sanamnyń bir túkpirinde jarq etti de, sońyn ala joq bolǵany esimde. Osylaisha toi bitkenshe talai qyz-kelinshekpen biledim.
Toi da ótti. Meniń biim de umyt bolǵan-dy. Óitkeni, bizdiń aýyldan men siiaqty bishiler kóp-tuǵyn. Meniń biimdi áńgime qylyp qaitsin. Arada birshama ýaqyt ótkennen keiin mektepte oqityn qyzym úige jylap kelmesi bar ma? «Kim tidi, saǵan» dep sheshesi ekeýmiz jan-jaqtan báiek bolyp jatyrmyz. Ol:
– Eshkim tigen joq. Búgin mektepte Feisbýkta ákemniń toidaǵy qisalańdap bilegen biin bútkil oqýshy kórip, qatty namystandym. Balalar «ákeń keremet bishi» eken dep áben mazaqtady, – degende uiattan jerge kirerdei boldym. Áleýmettik jelige salýshy «Araqqa toiyp alǵan otaǵasy toiǵa jinalǵan qyz-kelinshekterdiń bárimen bilep shyqty» dep jazyp qoiypty.
Iá, sol toida eki jastyń qýanyshyna ortaqtasyp, shyn júrekten qýanyp, alqyn-julqyn bilegenim ras. Áleýmettik jelige júktelgen videony qaraǵanymda muny sotkaǵa túsirip alǵan bireý salyp jibergenin baiqadym. Keremet biledim degenim de beker eken. Et pen teriniń arasyndaǵy jelik eken. Bárine qý araq kináli.
Biraq alqyn-julqyn bilegende turǵan ne bar. Qazir toiǵa barǵanda qýanyp bileýdiń ózi de qaýipti bolyp barady. Toi iesi toiǵa kelgen adamdardyń telefondaryn esiktiń kózinde turyp jinap alýy ǵana qaldy. Áitpese kóńildenip bilegenderdi vidoeǵa túsirip, jelige salyp, masqarasyn shyǵara berse, munyń sońy ne bolady? Muny oilaǵan jan bar ma? Álgi áleýmettik jelide jariialanǵan videonyń astyndaǵy jazbalarǵa jurt ne jazbaǵan deisizder?! Komentterdi oqyp otyryp, ózimdi dúniedegi eń sońǵy ońbaǵan adammyn ba dep qaldym. Muny oqyǵan qyzymnyń namystan jarylardai bolyp jylaǵanyn túsindim.
Jelidegi videony kórip, aýyldastarym «internetke shyqqanyńdy jýsańshy» dep birazǵa deiin qyljaqtap, syrtymnan bishi dep mazaqtap júrdi.
Mine osydan keiin toiǵa qaityp barǵyń keledi. Endi toiǵa barmaýǵa bekinip otyrmyn.
Nurlan JUMAHAN
