Májilis depýtaty Nartai Sársenǵaliev el biýdjetindegi sportqa bólinetin qarjynyń maqsatty ári tiimdi jumsalýyna bailanysty mańyzdy ózgeristerdi málimdedi. Onyń aitýynsha, endi sheteldik sportshylar memlekettik qarjydan ailyq, bonýs nemese transfer túrinde qarajat ala almaidy, dep habarlaidy Dalanews.kz.
“Qazaqstan Respýblikasynyń azamaty emes sportshylarǵa biýdjetten aqsha bólinbeidi. Sondai-aq “Samuryq-Qazyna” sekildi kvazimemlekettik kompaniialardyń qarajatynan da shetel azamattaryna qarjy berýge tyiym salyndy”, — dedi depýtat.
Sársenǵaliev buǵan deiin aqylǵa qonymsyz 180-nen astam sport túri tizimge engizilgenin atap ótti.
“Tipti onyń qatarynda “sporttyq balǵalaý” sekildi sport túri de boldy. Sony biz úsh esege qysqarttyq. Osylaisha biz “joǵary jetistikter sporty” degen arnaiy túsinik engizdik. Endi memleketten qarjylandyrý tek Olimpiada, Paralimpiada, Sýrdlimpiada, Aziia oiyndary, Paraaziia oiyndary jáne ulttyq sport túrlerine ǵana qarasty sporttarǵa beriledi. Onyń jalpy sany shamamen 60-qa jýyq”, — dep naqtylady ol.
Sonymen qatar “basym sport túrleri” degen jańa uǵym zańnamaǵa engizilgen. Bul — álemdik arenada naqty nátijege qol jetkizgen sport túrlerin aiqyndap, olarǵa qosymsha qoldaý kórsetýge baǵyttalǵan. Bastapqyda bul tizimde ulttyq sport túrleri bolmaǵan, alaida depýtattyń bastamasymen olar da engizilgen.
Depýtatyń aitýynsha, memleket qarjysy budan bylai úsh negizgi baǵytqa bólinedi:
1. Memlekettik sport mekemelerin qoldaý;
2. Buqaralyq sportty damytý;
3. Sport infraqurylymyn jetildirý.
Bul qadamdar biýdjettiń ashyqtyǵy men tiimdiligin arttyryp, sport salasyndaǵy ádilettikti qamtamasyz etýdi kózdeidi.
