Qazaqstanda bankomat arqyly kartaǵa salǵan aqsha 500 myń teńgeden joǵary bolsa, onda ony jóneltýshi JSN-nin kórsetýge mindetteledi. Al JSN kórsetpese, onda operatsiia júzege asyrylmai, bankomat aqshany keri qaitaryp beredi. Bul týraly búgin Úkimet otyrysynda QR Qarjy monitoringi agenttigi tóraǵasynyń orynbasary Qairat Bijanov málimdedi, dep habarlaidy Dalanews.kz.
"Qolma-qol aqshaǵa ainaldyrý shemalarynda bankomattardy paidalaný ózekti máselelerdiń biri bolyp tabylady. Qabyldanǵan sharalarǵa qaramastan, tiisti operatsiialardyń kólemi ósýde. Bul arada basty olqylyq – aqshany jiberýshi men alýshynyń tiisti sáikestendirýsiz, anonimdi túrde operatsiialardy júzege asyrý múmkindigi. Olar, kóbinese formaldy túrde bóten adamdarǵa tirkelgen kartalardy paidalana otyryp júzege asyrylady", dep túsindiredi Qairat Bijanov.
Osyndai qaýip-qaterdi azaitý úshin agenttik retteýshi organmen birlesip praktikalyq sheshimder keshenin ázirledi (2025 jylǵy 18 shildedegi komplaens-qyzmetter keńesi).
"Birinshiden, 500 myń teńgeden astam somaǵa kartany toltyrý kezinde jóneltýshiniń JSN-nin mindetti túrde kórsetýi talap etiledi (buryn alýshynyń JSN-y ǵana talap etiletin). Mobildi qosymsha nemese SMS arqyly operatsiiany rastaý múmkindigi qosymsha pysyqtalýda. Ekinshiden, 2026 jyldyń 1 qańtarynan bastap bankter bankomattardyń beinekameralarynan alynǵan jazbalardy keminde 180 kún boiy saqtaýǵa mindettelmek, bul kúdikti operatsiialarǵa qatysýshylardy anyqtaýǵa múmkindik beredi", - dep naqtylaidy ol.
Úshinshiden, biometriialyq sáikestendirýdi – betti nemese saýsaq izderin tanýdy engizý múmkindigi qarastyrylýda. Bul sharalardy júzege asyrý anonimdi tranzaktsiialar úshin qosymsha kedergi jasaidy, dep sanaidy QMA.
