قازاقستاندا بانكومات ارقىلى كارتاعا سالعان اقشا 500 مىڭ تەڭگەدەن جوعارى بولسا، وندا ونى جونەلتۋشى ءجسن-نىن كورسەتۋگە مىندەتتەلەدى. ال جسن كورسەتپەسە، وندا وپەراسيا جۇزەگە اسىرىلماي، بانكومات اقشانى كەرى قايتارىپ بەرەدى. بۇل تۋرالى بۇگىن ۇكىمەت وتىرىسىندا ق ر قارجى مونيتورينگى اگەنتتىگى ءتوراعاسىنىڭ ورىنباسارى قايرات بيجانوۆ مالىمدەدى، دەپ حابارلايدى Dalanews.kz.
"قولما-قول اقشاعا اينالدىرۋ سحەمالارىندا بانكوماتتاردى پايدالانۋ وزەكتى ماسەلەلەردىڭ ءبىرى بولىپ تابىلادى. قابىلدانعان شارالارعا قاراماستان، ءتيىستى وپەراسيالاردىڭ كولەمى وسۋدە. بۇل ارادا باستى ولقىلىق – اقشانى جىبەرۋشى مەن الۋشىنىڭ ءتيىستى سايكەستەندىرۋسىز، ءانونيمدى تۇردە وپەراسيالاردى جۇزەگە اسىرۋ مۇمكىندىگى. ولار، كوبىنەسە فورمالدى تۇردە بوتەن ادامدارعا تىركەلگەن كارتالاردى پايدالانا وتىرىپ جۇزەگە اسىرىلادى"، دەپ تۇسىندىرەدى قايرات بيجانوۆ.
وسىنداي قاۋىپ-قاتەردى ازايتۋ ءۇشىن اگەنتتىك رەتتەۋشى ورگانمەن بىرلەسىپ پراكتيكالىق شەشىمدەر كەشەنىن ازىرلەدى (2025 جىلعى 18 شىلدەدەگى كومپلاەنس-قىزمەتتەر كەڭەسى).
"بىرىنشىدەن، 500 مىڭ تەڭگەدەن استام سوماعا كارتانى تولتىرۋ كەزىندە جونەلتۋشىنىڭ ءجسن-نىن مىندەتتى تۇردە كورسەتۋى تالاپ ەتىلەدى (بۇرىن الۋشىنىڭ جسن-ى عانا تالاپ ەتىلەتىن). ءموبيلدى قوسىمشا نەمەسە SMS ارقىلى وپەراسيانى راستاۋ مۇمكىندىگى قوسىمشا پىسىقتالۋدا. ەكىنشىدەن، 2026 جىلدىڭ 1 قاڭتارىنان باستاپ بانكتەر بانكوماتتاردىڭ بەينەكامەرالارىنان الىنعان جازبالاردى كەمىندە 180 كۇن بويى ساقتاۋعا مىندەتتەلمەك، بۇل كۇدىكتى وپەراسيالارعا قاتىسۋشىلاردى انىقتاۋعا مۇمكىندىك بەرەدى"، - دەپ ناقتىلايدى ول.
ۇشىنشىدەن، بيومەتريالىق سايكەستەندىرۋدى – بەتتى نەمەسە ساۋساق ىزدەرىن تانۋدى ەنگىزۋ مۇمكىندىگى قاراستىرىلۋدا. بۇل شارالاردى جۇزەگە اسىرۋ ءانونيمدى ترانزاكسيالار ءۇشىن قوسىمشا كەدەرگى جاسايدى، دەپ سانايدى قما.
