استانا – قوستاناي تاسجولىندا بولعان اۋىر جول اپاتىنان بەلگٸلٸ ايتىسكەر اقىن, مەدەنيەت سالاسىنىڭ ٷزدٸگٸ سالتانات ٶتەلباەۆا مەن ونىڭ جۇبايى مىرزابەك قاسىموۆ كٶز جۇمدى, دەپ حابارلايدى dalanews.kz.
قارالى حاباردى مارقۇمنىڭ ەرٸپتەسٸ مارعۇلان وسپانوۆ ەلەۋمەتتٸك جەلٸدە جەتكٸزدٸ. ونىڭ ايتۋىنشا, ەرلٸ-زايىپتىلار استانادان تاڭعى ساعات 04:00 شاماسىندا جولعا شىققان. ولار قىزى التىنايدىڭ مەكتەپ بٸتٸرۋ سالتاناتىنا اسىعىپ بارا جاتقان. بٷگٸن قىزى قىزىل اتتەستات الۋى تيٸس بولعان.
"سۋىق حاباردى جەتكٸزۋگە مەجبٷرمٸن. جالعان ٶمٸر-اي, دەسەيشٸ! بٷگٸن ايتىسكەر اقىن, مەدەنيەت سالاسىنىڭ ٷزدٸگٸ, تاريح عىلىمدارىنىڭ ماگيسترٸ, ىبىراي التىنسارين مۋزەيٸ باسشىسىنىڭ ورىنباسارى سالتانات ٶتەلباەۆا جول اپاتىنا تٷسٸپ, جۇبايى مىرزابەك قاسىموۆ ەكەۋٸ دە قازا تاپتى", – دەپ جازدى مارعۇلان وسپانوۆ.
ونىڭ سٶزٸنشە, مارقۇمداردىڭ جالعىز ۇلى نۇرسۇلتان تاڭەرتەڭ حابارلاسىپ, اتا-اناسىنان ايىرىلعانىن ايتقان.
"جالعىز ۇلى نۇرسۇلتان تاڭعى ساعات 9-دا: "اعا, اتا-انامنان ايىرىلىپ قالدىم", – دەپ حابارلاستى. بٷگٸن قىزى التىنايدىڭ مەكتەپتٸ ٷزدٸك بٸتٸرٸپ, قىزىل اتتەستات الاتىن كٷنٸ ەدٸ. ٷلگەرەمٸز دەپ اسىقتى ما ەكەن, استانادان تاڭعى ساعات 4-تە جولعا شىعىپ كەتٸپتٸ. اتباسار مەن ەسٸلدٸڭ ورتاسىندا جول اپاتى بولدى", – دەدٸ ول.
ەرٸپتەستەرٸ سالتانات ٶتەلباەۆانى اشىق مٸنەزدٸ, مەيٸرٸمدٸ, پاراساتتى جان رەتٸندە ەسكە الدى. ول ۇزاق جىلدار بويى ىبىراي التىنسارين مۋزەيٸندە ەڭبەك ەتٸپ, مەدەني مۇرانى ساقتاۋ مەن ناسيحاتتاۋعا ەلەۋلٸ ٷلەس قوسقان.
سونداي-اق ونىڭ جەتەكشٸلٸگٸمەن مۋزەيدە بٸرنەشە عىلىمي-زەرتتەۋ جوباسى مەن كٶرمە ۇيىمداستىرىلعانى ايتىلدى.
