Astana – Qostanai tasjolynda bolǵan aýyr jol apatynan belgili aitysker aqyn, mádeniet salasynyń úzdigi Saltanat Ótelbaeva men onyń jubaiy Myrzabek Qasymov kóz jumdy, dep habarlaidy dalanews.kz.
Qaraly habardy marqumnyń áriptesi Marǵulan Ospanov áleýmettik jelide jetkizdi. Onyń aitýynsha, erli-zaiyptylar Astanadan tańǵy saǵat 04:00 shamasynda jolǵa shyqqan. Olar qyzy Altynaidyń mektep bitirý saltanatyna asyǵyp bara jatqan. Búgin qyzy qyzyl attestat alýy tiis bolǵan.
"Sýyq habardy jetkizýge májbúrmin. Jalǵan ómir-ai, deseishi! Búgin aitysker aqyn, mádeniet salasynyń úzdigi, tarih ǵylymdarynyń magistri, Ybyrai Altynsarin mýzeii basshysynyń orynbasary Saltanat Ótelbaeva jol apatyna túsip, jubaiy Myrzabek Qasymov ekeýi de qaza tapty", – dep jazdy Marǵulan Ospanov.
Onyń sózinshe, marqumdardyń jalǵyz uly Nursultan tańerteń habarlasyp, ata-anasynan aiyrylǵanyn aitqan.
"Jalǵyz uly Nursultan tańǵy saǵat 9-da: "Aǵa, ata-anamnan aiyrylyp qaldym", – dep habarlasty. Búgin qyzy Altynaidyń mektepti úzdik bitirip, qyzyl attestat alatyn kúni edi. Úlgeremiz dep asyqty ma eken, Astanadan tańǵy saǵat 4-te jolǵa shyǵyp ketipti. Atbasar men Esildiń ortasynda jol apaty boldy", – dedi ol.
Áriptesteri Saltanat Ótelbaevany ashyq minezdi, meiirimdi, parasatty jan retinde eske aldy. Ol uzaq jyldar boiy Ybyrai Altynsarin mýzeiinde eńbek etip, mádeni murany saqtaý men nasihattaýǵa eleýli úles qosqan.
Sondai-aq onyń jetekshiligimen mýzeide birneshe ǵylymi-zertteý jobasy men kórme uiymdastyrylǵany aityldy.
