Búgin Aqordada kezekti kadrlyq aýys-túiis boldy. Ǵani Beisembaev Oqý-aǵartý ministri qyzmetinen ketip, ornyna Májilis depýtaty Juldyz Súleimenova taǵaiyndaldy. Osy ózgeriske bailanysty Qazaqstannyń qurmetti ustazy, qoǵam belsendisi Ómir Shynybekuly men belgili pedagog Aiatjan Ahmetjanuly Dalanews.kz agenttigine pikir bildirip, burynǵy ministrdiń jumysyna baǵa berdi.
Beisembaev - eń sátsiz ministr
Shynybekulynyń sózinshe, Beisembaev tusynda muǵalimderge qarsy túrli aryz-shaǵym kóbeigen.
“Ǵani Beisembaevty keiingi onjyldyqtaǵy eń sátsiz ministrlerdiń biri dep esepteimin. Onyń tusynda arzan piarǵa kóp jol berildi, al belsendi pedagogtarǵa qysym kúsheidi. Máselen, 2023 jyly maǵan qatysty Bas prokýratýraǵa jáne Ishki ister ministrligine ártúrli aryz tústi. Tipti, Almatydan múlde tanymaityn mektep direktory Shymkent qalasynyń politsiiasyna aryzdanǵan. Sol jyly Túrkistan oblysy Jetisai aýdanyndaǵy mektep direktory men sharýashylyq jónindegi orynbasary da sotqa berdi. Osyndai jaittardan keiin 2023 jyl men úshin eń aýyr, “sandalǵan” jyl boldy deýge bolady”, — deidi ol.
Sondai-aq ol eks-ministrdiń "Nysanaly mektep” jobasyn da synǵa aldy.
“Bul joba alǵash qabyldanǵan kezde shikiligi kóp boldy. Máselen, byltyr muǵalimderdi sabaq ústinde onlain kýrstar ótýge májbúrledi. Osyndai mysaldar jetkilikti. Sondyqtan men Beisembaevty eń sátsiz ministrlerdiń biri dep esepteimin”, – dedi ol.
Shynybekulynyń aitýynsha, bilim júiesine túbegeili reforma qajet.
“Bizde reforma dep aitylǵanmen, pálen jyldan beri eshqandai túbegeili ózgeris jasalǵan joq. Tek Aimaǵambetov tusynda birqatar igi bastamalar kóterildi, keiin ókinishke qarai toqtap qaldy. Bilim salasyna naǵyz reforma qajet. Ol eń aldymen maman daiarlaý júiesinen bastalýy tiis. Óitkeni muǵalimdi durys daiyndamai, sapaly bilim berý týraly aitý múmkin emes. Sondyqtan bul salada atqarylatyn jumys áli de kóp”, – dedi Ómir Shynybekuly.
2 jyl 9 aidyń ishinde oqý-aǵartý ministrligi shashylyp qaldy — Aiatjan Ahmetjanuly
Oqý-aǵartý ministrligin 2 jyl 9 ai basqarǵan Ǵani Beisembaevtyń jumysyna qatysty pedagog, bilim salasynyń sarapshysy Aiatjan Ahmetjanuly da syn aitty. Onyń aitýynsha, ministr ózine artylǵan senimdi aqtai almady.
"Tamada ministr sóilep keldi, sóilep qoshtasty. Sózimen kelip, sózimen ketti. Aldyńǵy ministrdiń tusynda qabyldanǵan biraz oń sheshimderdiń kúshin joidy. Mysaly, “Altyn belgilerge” qatysty sheshim, 1-synypqa qabyldaý ýaqytyn ózgertý, aqyly olimpiadalardy toqtatý siiaqty mańyzdy qadamdardyń bári qaitadan álsiretildi", – deidi ol.
Aiatjan Ahmetjanulynyń sózinshe, Beisembaevtyń negizgi ýádeleri oryndalmai qaldy. Ol birneshe mysaldy tizip berdi:
• Synyp jetekshiligi úshin qosymsha aqy úsh ese ósedi degen ýáde berildi, alaida "úsh ese túgili, 3 paiyz da qosylmady".
• Oqý baǵdarlamalaryn jańartý máselesinde kerisinshe beikásibilik baiqaldy.
"Himiia, fizika, biologiiany qosyp jaratylystaný qylý, algebra men geometriiany biriktirý – otpen sýdy qosqanmen teń", – deidi sarapshy.
• Qaǵazbastylyqty azaitý ornyna, muǵalimderdiń qujattary men esepteri bes esege artqan.
• Ministrdiń súiikti isine ainalǵan forýmdar men jinalystar, "tárbielik sharalardy áleýmettik jelide rils túrinde túsirý" – bilim sapasyn arttyrmai, kerisinshe, jaǵdaidy ýshyqtyrǵan.
• Muǵalimderge qysym jasaý, sotqa berý faktileri de onyń tusynda oryn alǵan.
Sondai-aq Aiatjan Ahmetjanulynyń aitýynsha, prezident bastamasymen qolǵa alynǵan “Jaily mektep” jobasy shatqaiaqtap, 367 mekteptiń ornyna tek 217-i ǵana josparǵa engen.
“Jobaǵa avtor bolǵysy kelip, ony “Keleshek mektepteri” dep qaita ataǵanymen, nátije bolmady”, – deidi ol.
Sarapshynyń sózinshe, eń úlken daýlardyń biri – nysanaly mektepter jobasy.
“Qarjy shashyldy, esep-qisap kóbeidi, biraq nátije joq. Al pedagogterdiń attestatsiiasy kerisinshe, burynǵydan da kúrdelene tústi.
Jekemenshik mektepter de tentirep qaldy. Astanada biraz mektep óz qarjysyn ala almai júr. Bilimge qarjy quiǵan qanshama janashyr jandardyń eńbegi kúidi. Ókinishke qarai, oqý-aǵartý ministrligi shyn máninde shashylyp qaldy. Endi jańa ministrge osy shashylǵan salany jinap alý degen aýyr júk qaldy. Biýdjet tapshylyǵy men orynsyz josparlaýdyń zardabyn áli de tarta beremiz dep qorqamyn”, – dep túiindedi ol.
Sonymen qatar Ahmetjanuly jańa ministr Juldyz Súleimenova jaily oiyn da ortaǵa saldy.
"Juldyz Dosbergenqyzy Súleimenova – bilim salasyna búgin kelgen esim emes. 2007 jyly eńbek jolyn qarapaiym mektep muǵalimi retinde bastaǵan. Sodan beri 18 jyl boiy osy salanyń ainalasynda júr. Depýtat bolǵanda da áleýmettik sala komitetiniń quramynda boldy. Nazarbaev ziiatkerlik mektepter departamenti tóraǵa orynbasary, Almatydaǵy Nazarbaev ziiatkerlik mektebiniń direktory qyzmetin atqardy", – deidi ol.
Aiatjan Ahmetjanulynyń sózinshe, jańa ministrdiń birqatar artyqshylyǵy bar:
- Talapshyl, minezdi, aitqanyn jasata alady.
- Saýatty, salany ishinen de, syrtynan da jaqsy biledi.
- Qai tilge de jetik, bolmysy qazaqy.
- Sala mamany retinde naqty josparlary bar, burynnan aityp kele jatqan oilaryn iske asyrady dep senim bildiremin.
"Ózim úlken úmit kútemin hám qatty qýandym. Qiyny – ministrlik shashyraǵan tusta keldi. Sharýa shash etekten. Eń basty dúnie – bilim berý baǵdarlamasy men oqýlyqtardy jańartý. Naqty aitqanda, bilim mazmunyn retteý. Bul kezek kúttirmeitin sharýa. Sebebi, 2016 jyldan beri aitylyp kele jatqan másele. Juldyz hanym muny jaqsy túsinedi dep oilaimyn", – dedi sarapshy.
Aita keteiik, búgin, 29 qyrkúiekte Memleket basshysynyń jarlyǵymen Ǵani Bektaiuly Beisembaev Qazaqstan Respýblikasynyń oqý-aǵartý ministri laýazymynan bosatyldy.
Ol 2023 jylǵy qańtardan bastap Qazaqstan Respýblikasynyń oqý-aǵartý ministri qyzmetin atqarǵan edi.
Onyń ornyna Májilis depýtaty Juldyz Súleimenova Oqý-aǵartý ministri bolyp taǵaiyndaldy.
Juldyz Súleimenova kim?
Juldyz Dosbergenqyzy Súleimenova 1983 jyly 25 tamyzda Aqtóbe oblysynda dúniege kelgen. Bilimi joǵary, ǵylym kandidaty.
Ál-Farabi atyndaǵy Qazaq ulttyq ýniversitetinde tarih mamandyǵy boiynsha bilim alǵan. Keiin filosofiia jáne saiasattaný baǵyty boiynsha magistratýra men doktorantýrany támamdap, 2012 jyly «Mádeniettaný» mamandyǵy boiynsha PhD dárejesin qorǵaǵan.
Eńbek joly
Súleimenova eńbek jolyn jastar saiasaty men bilim salasynan bastady.
• 2000–2004 jyldary QazUÝ stýdenttik ózin-ózi basqarý uiymyn basqardy.
• 2004–2006 jyldary Aqtóbede áleýmettik-gýmanitarlyq pánder oqytýshysy ári jastar komitetiniń tóraǵasy boldy.
• 2006–2007 jyldary «Otan» partiiasynyń Aqtóbedegi filialynda jastar isi jónindegi keńesshi, «Jas Otan» jastar qanatynyń tóraǵa orynbasary qyzmetin atqardy.
• 2007–2008 jyldary Almatydaǵy Y.Altynsarin atyndaǵy №159 gimnaziiada tarih jáne quqyq pániniń muǵalimi boldy.
• 2010 jyldan bastap birqatar joǵary oqý oryndarynda jetekshilik qyzmet atqaryp, stýdenttik istermen ainalysty.
• 2012 jyldan 2019 jylǵa deiin «Nazarbaev Ziiatkerlik mektepteri» júiesinde túrli basqarýshy laýazymdarda boldy.
• 2019–2021 jyldary Almaty qalasyndaǵy fizika-matematika baǵytyndaǵy NZM direktory qyzmetin atqardy.
Saiasattaǵy joly
2021 jyly «AMANAT» partiiasy atynan Májilis depýtaty bolyp sailandy. Áleýmettik-mádeni damý komitetiniń múshesi retinde jumys istedi.
2023 jyly qaita sailanyp, VIII shaqyrylymda depýtattyq mandatyn jalǵastyrdy.
29 qyrkúiek kúni Memleket basshysynyń Jarlyǵymen Juldyz Súleimenova Qazaqstan Respýblikasynyń Oqý-aǵartý ministri bolyp taǵaiyndaldy.
Rýslan Jeldibai Aqordadaǵy aýys-túiiske qatysty qandai pikir bildirdi?
Prezidentiniń kómekshisi – prezidenttiń baspasóz hatshysy Rýslan Jeldibaidyń sózinshe, keiingi kadrlyq ózgeristerge bailanysty BAQ ókilderinen kóptegen saýal túse bastaǵan.
"Eń aldymen, myna máseleni basa aitý kerek, bul – ádettegi kadrlyq rotatsiia. Negizgi maqsat – memlekettik júiedegi eń mańyzdy baǵyttardyń tiimdiligin kúsheitý. Memleket basshysy jýyrdaǵy Joldaýynda ulttyq ekonomikaǵa túsetin investitsiia kólemin arttyrýdy basym mindettiń biri retinde belgiledi", - deidi Rýslan Jeldibai.
Bul mańyzdy sala tájiribeli diplomat Murat Nurtileýge júkteldi.
"Prezidenttiń kómekshisi retinde ol halyqaralyq investitsiialyq jáne saýda yntymaqtastyǵyn ilgeriletý maqsatynda shet memleketterdiń joǵary deńgeidegi ókilderimen, sondai-aq álemdik iri kompaniialardyń jetekshilerimen bailanysty damytady", - deidi prezidenttiń kómekshisi.
