Elordada «Igi ister marafony» jalǵasyp, kópbalaly otbasylarǵa azyq-túlik sebetteri taratylýda
«Igi ister marafony» aiasynda Halyqaralyq áielder kúni qarsańynda Nur-Sultan ákimdiginiń bastamasymen halyqtyń áleýmettik osal toptaryna azyq-túlik sebetteri taratylýda, – dep habarlaidy Dalanews.kz elorda ákimdiginiń resmi saityna silteme jasap.
Elordada 6-8 naýryz aralyǵynda «Igi ister marafony» aiasynda 500-den astam azyq-túlik sebetin taratý josparlanǵan. Azyq-túlik jiyntyǵyna kúndelikti qajetti ónimder kiredi.
Olardyń arasynda kúnbaǵys maiy, un, kúrish, jarma, qant, shai, makaron ónimderi, et konservileri, kámpitter, balalarǵa arnalǵan táttiler bar. Kómek elordanyń barlyq tórt aýdanynda turatyn otbasylarǵa kórsetiledi.
– Qala ákimdigi demeýshilermen birlesip, Halyqaralyq áielder kúni qarsańynda «Igi ister marafony» qaiyrymdylyq aktsiiasyn bastady. Biz barlyq muqtaj azamattarǵa arnaiy tizim boiynsha azyq-túlik sebetterin úlestire bastadyq. Olardyń arasynda qarttar, I, II, III toptaǵy múgedekter, múgedek balalardy tárbielep otyrǵan otbasylar, jalǵyz basty analar, kópbalaly otbasylar bar. Aktsiia aiasynda 6-8 naýryz kúnderi 500-den astam otbasyǵa kómektesýdi josparlap otyrmyz. Mundai sharalar naýryz aiynyń sońyna deiin jalǵasady. Aidyń sońyna deiin biz bir myńnan astam otbasyn qamtýdy josparlap otyrmyz. Kómek demeýshiler esebinen kórsetiledi. Bul sebetterdi úilerge ákimdik qyzmetkerleri, eriktiler, qarapaiym azamattar jetkizedi, – dedi Nur-Sultan qalasy ákiminiń keńesshisi Qýanysh Moldabek.
Óz kezeginde sebet alǵan elorda turǵyny, kópbalaly ana Arailym Aripova alǵys aityp, barlyq áielderdi 8 naýryz merekesimen quttyqtady.
– Men bes balanyń anasymyn, qala ákimdigi men eriktiler tarapynan jasalǵan kútpegen syilyq úshin úlken alǵysymdy bildirgim keledi. Mundai merekede kóp balaly analar týraly umytpaǵan jón, bul kútpegen jáne jaǵymdy jaǵdai. Osy múmkindikti paidalanyp, barlyq analardy kele jatqan 8 naýryz merekesimen quttyqtaimyn! – dedi kópbalaly ana Arailym Aripova.
Sondai-aq, qalalyq ákimdik ókili áielderdi quttyqtap, elordanyń janashyr azamattaryna úndeý joldady.
– Nur-Sultan qalasynyń ákimdigi názik jandylardy kele jatqan merekemen quttyqtaidy, sondai-aq janashyr azamattardy osy aktsiiany qoldaýǵa, azyq-túlik sebetin jinaýǵa jáne ony muqtaj otbasylarǵa jetkizýge shaqyrady, – dedi Qýanysh Moldabek.
Merekelik sebetke ie bolǵan ózge turǵyndar da rizashylyqtaryn bildirdi. Búginge deiin azyq-túlik sebetteri 300-den astam otbasyǵa jetkizilgen. Qalǵandary jaqyn kúnderi beriledi. Jetkizý barysynda sanitarlyq normalar tolyqtai saqtalady.
Esterińizge sala keteiik, 2021 jyly «Igi ister marafony» aiasynda elordanyń muqtaj turǵyndaryna 15 myńnan astam azyq-túlik sebeti taratyldy.
