Sońǵy ýaqyttary Astana qalasy ákimdigi jergilikti quqyq qorǵaý organdarymen birlesip, qaldaǵy oryn alyp jatqan vandalizmniń aldyn alý jáne tártip buzýshylarmen kúres jumystaryn nyǵaitý úshin birqatar sharalar atqarýda. Óz kezeginde Dalanews.kz aqparattyq agenttigi bul baǵyttaǵy jumystardy keńinen nasihattap, jat qylyqtardy toqtatýǵa óz úlesin qosyp keledi.
Buǵan deiin de qalada kóptegen qoǵamdyq múlikti búldirý áreketteri anyqtalyp, olar boiynsha tiisti sharalar qoldanylǵan bolatyn. Máselen, biylǵy jyldyń basynan beri politsiia elordadaǵy birqatar áleýmettik nysandar men qoǵamdyq oryndardy arnaiy baqylaýǵa alyp, beinebaqylaý kameralary arqyly qadaǵalady.
Osy baqylaý nátijesinde túrli vandalizm áreketterine qatysy bar birneshe adam anyqtalyp, olar zańdy túrde jazasyn alǵan bolatyn. Bul sharalar qaladaǵy qoǵamdyq tártip pen turǵyndardyń qaýipsizdigin saqtaý úshin mańyzdy ról atqarǵany sózsiz.
Taiaýda astanalyq quqyq qorǵaýshylar jeke adamnyń múlkine ziian keltirgen taǵy bir vandaldy ustap, jaýapkershilikke tartty. Aitalyq 22 qyrkúiek kúni keshki saǵat jetiler shamasynda 34 jastaǵy áiel adam Jansúgirov kóshesi, 12 úidiń terezesin syndyryp, múlkin búldirgen. Onyń áreketterinen keltirilgen shyǵyn 36 145 teńgeni qurady. Dál osyndai oqiǵa birneshe kún ótken soń Muhamedhanov kóshesi, 12 úide oryn aldy. 39 jastaǵy er adam páterdiń kireberis esigin ádeii zaqymdaǵan.
Búginde qoǵamdyq tártip buzýshylardyń ekeýi de ákimshilik jaýapkershilikke tartylyp, aiyppul salyndy.
Astana qalasy ákimdigi pen politsiia departamenti birlesip, «Qaýipsiz qala» baǵdarlamasyn iske asyrdy. Atalymysh baǵdarlama aiasynda qalanyń ártúrli aýdandaryna qosymsha beinebaqylaý kameralary ornatylǵan bolatyn.
Budan basqa, qala turǵyndarymen kezdesý barysynda politsiia qyzmetkerleri vandalizm áreketterine qarsy kúresýdiń mańyzdylyǵyn túsindirip, quqyq buzýshylyqtardyń aldyn alý boiynsha aqparattyq kezdesýler ótkizýdi de dástúrge ainaldyrdy desek bolady.
Qaladaǵy áleýmettik nysandarǵa, saiabaqtarǵa jáne mádeni eskertkishterge qorǵaý sharalary kúsheitýdiń mańyzy zor. Vandalizm áreketterine tózbeýshilik tanytý úshin halyq arasynda nasihattaý jumystary kúsheitip, bilim berý mekemelerinde tártipti saqtaý jóninde arnaiy sabaqtar ótkizip keledi.
Budan basqa Astanadaǵy qoǵam belsendileri, eriktiler jáne stýdentter de bul iske óz úlesterin qosýda. Olar arnaiy aktsiialarǵa qatysyp, qalalyq múlikti qorǵaýǵa baǵyttalǵan is-sharalarǵa atsalysty. Mundai bastamalar qala turǵyndary arasynda qoǵamdyq múlikke degen jaýapkershilik sezimin arttyrýǵa baǵyttalǵan.
Osy rette elordada «Stop, vandal» aktsiiasy aiasynda Astanada kúndizgi jáne túngi reidter uiymdastyrylyp, halyq arasynda qoǵamdyq tártipti saqtaý, qalalyq múlikke uqypty qaraý mańyzdylyǵy týraly túsindirý jumystary qarqyndy júrýde. Sharany uiymdastyrýǵa jaýapty azamatta aktsiianyń maqsaty – vandalizmniń kez kelgen kórinisin toqtatyp, elordadaǵy tazalyq pen tártipti saqtaýdy nasihattaý ekenin alǵa tartty. Jyl boiy ótken aktsiiaǵa elordadaǵy eriktiler, belsendiler, tanymal sportshylar, qoǵam qairatkerleri jáne qalaǵa janashyr turǵyndar qatysqanyn aita ketýimiz kerek.
Quqyq qorǵaý organdarynyń málimetine súinsek, jyl basynan beri sot 250 adamdy bóten múlikti ádeii búldirgeni, qoǵamdyq oryndardy lastaǵany, ǵimarattar men turǵyn úilerdi zaqymdaǵany úshin jaýapkershilikke tartty. Búginde vandaldardyń bári jazasyn alyp, ákimshilik jaýapkershilikke tartylǵan. Bas qalada vandalizmniń aldyn alý jumystary qalalyq prokýratýra jáne politsiia departamentimen úilestirilip júrgizýde.
