Astanada kámeletke tolmaǵandar arasynda ómirine qaýipti áreketterdiń aldyn alý jáne boldyrmaý baǵytynda júieli jumys júrgizilýde. Monitoringti qalalyq psihikalyq densaýlyq ortalyǵy meditsinalyq uiymdarmen birlese júzege asyryp otyr, dep habarlaidy Dalanews.kz qalalyq Qoǵamdyq densaýlyq saqtaý basqarmasyna silteme jasap.
Taldaý kórsetkendei, mundai jaǵdailar kóbinese otbasyndaǵy nemese dostar arasyndaǵy janjaldarǵa bailanysty bolady. Qalalyq psihikalyq densaýlyq ortalyǵy direktorynyń orynbasary Elena Polienkonyń aitýynsha, mundai áreketter ata-ananyń ne muǵalimderdiń nazaryn aýdartýǵa nemese qarsylyq bildirýge tyrysýdan týyndaidy.
Qoǵamdyq densaýlyq saqtaý basqarmasynyń basshysy Áliia Rústemova Astanada mundai oqiǵalardyń aldyn alý sharalary kúsheitilip, profilaktikaǵa qatysty tásilderdiń túzetilgenin atap ótti.
Jastardyń 10-nan 29 jasqa deiingi psihikalyq saýlyǵyn qorǵaý úshin elordada 11 jastar ortalyǵy jumys isteidi. Olar emhanalar bazasynda («№2 qalalyq emhana», «№3 qalalyq emhana», «№4 qalalyq emhana», «№5 qalalyq emhana», «№6 qalalyq emhana», «№8 qalalyq emhana», «№9 qalalyq emhana», «Alǵashqy meditsinalyq-sanitariialyq kómek ortalyǵy», «Astana Clinic» JShS, «Salaýatty astana» JShS, «City» emhanasy JShS) ashylǵan. Munda 82 psiholog kómek kórsetedi.
Sonymen qatar, jedel qoldaýdy Qalalyq psihikalyq densaýlyq ortalyǵynyń mamandary psihiatriialyq bólimshedegi kabinetterde jáne táýlik boiy jumys isteitin senim telefony arqyly (54-76-03) kórsetedi.
Astanadaǵy profilaktikalyq jumys mektepterden bastap emhanalar men arnaiy ortalyqtarǵa deiingi barlyq deńgeidi qamtidy. Negizgi maqsat – táýekel tobyna jatatyn balalar men jastardy der kezinde anyqtap, olardy keshendi qoldaýmen qamtamasyz etý.
