Astana qalasynda Qajymuqan Muńaitpasov atyndaǵy ortalyq stadionnyń ornyna jańa nysannyń qurylysy josparlanýda. Bul sheshim stadionnyń tehnikalyq jaǵdaiynyń nasharlaýyna bailanysty qabyldanǵan, – dep habarlaidy Dalanews.kz Astana qalasy ákiminiń baspasóz qyzmetine
Jańa stadionnyń qurylysy Astana qalasynyń sport infraqurylymyn jaqsartýǵa, turǵyndar men qonaqtarǵa zamanaýi jáne qaýipsiz sporttyq nysan usynýǵa baǵyttalǵan.
Bul joba elordadaǵy sporttyq is-sharalardyń deńgeiin arttyryp, halyqtyń salaýatty ómir saltyn ustanýyna yqpal etedi dep kútilýde.
«Memsaraptama» RMK Astanada Munaitpasov atyndaǵy stadionnyń qurylysyna jobalyq qujattamany qaraý qorytyndysy boiynsha oń qorytyndy berdi.
Nysannyń qurylysy Saryarqa aýdanyndaǵy Kenesary kóshesi, 14 meken-jaiy boiynsha qarastyrylǵan. Nysannyń qurylys alańy 15 myń sh.m. asady.
– Bolashaq stadionnyń ǵimaraty 3 600 adamǵa arnalǵan úsh qabatty bolady. Stadion batys jáne shyǵys jaǵynda ár túrli qabattaǵy eki bloktan turatyn jabyq ǵimarat bolady, onyń ústine metall arka qosylǵan, – delingen ministrliktiń habarlamasynda.
Jobanyń qurylysyna tapsyrys berýshi «Astana qalasynyń qurylys basqarmasy» MM, bas jobalaýshy – «Qurylyskonsalting UO» AQ Astana qalasy jáne Aqmola oblysy boiynsha filialy. Jobany 16 aida aiaqtaý josparlanýda.
Bas qalada sporttyq infraqurylymdy damytýdyń mańyzy zor. Osyǵan deiin Astana qalasy biraz halyqaralyq mańyzdy sporttyq jarystardy joǵary deńgeide ótkizgenin bilemiz. Budan basqa qala turǵyndarynyń dene shynyqtyrýmen jáne sportpen ainalysýyna da qolaily jaǵdai jasaýdyń mańyzy zor.
Qazirgi tańda qalada 1 081 dene shynyqtyrý, sporttyq jáne dene shynyqtyrý-saýyqtyrý baǵytyndaǵy uiymdar jumys isteidi. Bul uiymdarda 551 692 adam turaqty túrde sportpen shuǵyldanady, bul qala turǵyndarynyń jalpy sanynyń 39,1%-yn quraidy.
Sonymen qatar Astana qalasynda olimpiadalyq sport túrlerin damytý qarqyndy júrgizilýde. Qala quramasynyń 130 sportshysy 35 sport túrinen Qazaqstan Respýblikasynyń ulttyq quramasynyń shtattyq komandasyna engen. Daryndy sportshylardy qoldaý maqsatynda 2023 jyly 15 joǵary sanatty sportshymen sporttyq qyzmet týraly kelisim jasaldy.
Astana qalasynda sporttyq infraqurylymdy damytý baǵytyndaǵy jumystar júieli túrde júrgizilip, turǵyndardyń salaýatty ómir saltyn ustanýyna barlyq jaǵdai jasalýda.
