Астана қаласында Қажымұқан Мұңайтпасов атындағы орталық стадионның орнына жаңа нысанның құрылысы жоспарлануда. Бұл шешім стадионның техникалық жағдайының нашарлауына байланысты қабылданған, – деп хабарлайды Dalanews.kz Астана қаласы әкімінің баспасөз қызметіне

Жаңа стадионның құрылысы Астана қаласының спорт инфрақұрылымын жақсартуға, тұрғындар мен қонақтарға заманауи және қауіпсіз спорттық нысан ұсынуға бағытталған.

Бұл жоба елордадағы спорттық іс-шаралардың деңгейін арттырып, халықтың салауатты өмір салтын ұстануына ықпал етеді деп күтілуде.

«Мемсараптама» РМК Астанада Мұнайтпасов атындағы стадионның құрылысына жобалық құжаттаманы қарау қорытындысы бойынша оң қорытынды берді.

Нысанның құрылысы Сарыарқа ауданындағы Кенесары көшесі, 14 мекен-жайы бойынша қарастырылған. Нысанның құрылыс алаңы 15 мың ш.м. асады.

– Болашақ стадионның ғимараты 3 600 адамға арналған үш қабатты болады. Стадион батыс және шығыс жағында әр түрлі қабаттағы екі блоктан тұратын жабық ғимарат болады, оның үстіне металл арка қосылған, – делінген министрліктің хабарламасында.

Жобаның құрылысына тапсырыс беруші «Астана қаласының құрылыс басқармасы» ММ, бас жобалаушы – «Құрылысконсалтинг ҰО» АҚ Астана қаласы және Ақмола облысы бойынша филиалы. Жобаны 16 айда аяқтау жоспарлануда.

Бас қалада спорттық инфрақұрылымды дамытудың маңызы зор. Осыған дейін Астана қаласы біраз халықаралық маңызды спорттық жарыстарды жоғары деңгейде өткізгенін білеміз. Бұдан басқа қала тұрғындарының дене шынықтырумен және спортпен айналысуына да қолайлы жағдай жасаудың маңызы зор.

Қазіргі таңда қалада 1 081 дене шынықтыру, спорттық және дене шынықтыру-сауықтыру бағытындағы ұйымдар жұмыс істейді. Бұл ұйымдарда 551 692 адам тұрақты түрде спортпен шұғылданады, бұл қала тұрғындарының жалпы санының 39,1%-ын құрайды.

Сонымен қатар Астана қаласында олимпиадалық спорт түрлерін дамыту қарқынды жүргізілуде. Қала құрамасының 130 спортшысы 35 спорт түрінен Қазақстан Республикасының ұлттық құрамасының штаттық командасына енген. Дарынды спортшыларды қолдау мақсатында 2023 жылы 15 жоғары санатты спортшымен спорттық қызмет туралы келісім жасалды.

Астана қаласында спорттық инфрақұрылымды дамыту бағытындағы жұмыстар жүйелі түрде жүргізіліп, тұрғындардың салауатты өмір салтын ұстануына барлық жағдай жасалуда.