استانا قالاسىندا قاجىمۇقان مۇڭايتپاسوۆ اتىنداعى ورتالىق ستاديوننىڭ ورنىنا جاڭا نىساننىڭ قۇرىلىسى جوسپارلانۋدا. بۇل شەشىم ستاديوننىڭ تەحنيكالىق جاعدايىنىڭ ناشارلاۋىنا بايلانىستى قابىلدانعان، – دەپ حابارلايدى Dalanews.kz استانا قالاسى اكىمىنىڭ باسپا ءسوز قىزمەتىنە
جاڭا ستاديوننىڭ قۇرىلىسى استانا قالاسىنىڭ سپورت ينفراقۇرىلىمىن جاقسارتۋعا، تۇرعىندار مەن قوناقتارعا زاماناۋي جانە ءقاۋىپسىز سپورتتىق نىسان ۇسىنۋعا باعىتتالعان.
بۇل جوبا ەلورداداعى سپورتتىق ءىس-شارالاردىڭ دەڭگەيىن ارتتىرىپ، حالىقتىڭ سالاۋاتتى ءومىر سالتىن ۇستانۋىنا ىقپال ەتەدى دەپ كۇتىلۋدە.
«مەمساراپتاما» رمك استانادا مۇنايتپاسوۆ اتىنداعى ستاديوننىڭ قۇرىلىسىنا جوبالىق قۇجاتتامانى قاراۋ قورىتىندىسى بويىنشا وڭ قورىتىندى بەردى.
نىساننىڭ قۇرىلىسى سارىارقا اۋدانىنداعى كەنەسارى كوشەسى، 14 مەكەن-جايى بويىنشا قاراستىرىلعان. نىساننىڭ قۇرىلىس الاڭى 15 مىڭ ش.م. اسادى.
– بولاشاق ستاديوننىڭ عيماراتى 3 600 ادامعا ارنالعان ءۇش قاباتتى بولادى. ستاديون باتىس جانە شىعىس جاعىندا ءار ءتۇرلى قاباتتاعى ەكى بلوكتان تۇراتىن جابىق عيمارات بولادى، ونىڭ ۇستىنە مەتالل اركا قوسىلعان، – دەلىنگەن مينيسترلىكتىڭ حابارلاماسىندا.
جوبانىڭ قۇرىلىسىنا تاپسىرىس بەرۋشى «استانا قالاسىنىڭ قۇرىلىس باسقارماسى» مم، باس جوبالاۋشى – «قۇرىلىسكونسالتينگ ۇو» اق استانا قالاسى جانە اقمولا وبلىسى بويىنشا فيليالى. جوبانى 16 ايدا اياقتاۋ جوسپارلانۋدا.
باس قالادا سپورتتىق ينفراقۇرىلىمدى دامىتۋدىڭ ماڭىزى زور. وسىعان دەيىن استانا قالاسى ءبىراز حالىقارالىق ماڭىزدى سپورتتىق جارىستاردى جوعارى دەڭگەيدە وتكىزگەنىن بىلەمىز. بۇدان باسقا قالا تۇرعىندارىنىڭ دەنە شىنىقتىرۋمەن جانە سپورتپەن اينالىسۋىنا دا قولايلى جاعداي جاساۋدىڭ ماڭىزى زور.
قازىرگى تاڭدا قالادا 1 081 دەنە شىنىقتىرۋ، سپورتتىق جانە دەنە شىنىقتىرۋ-ساۋىقتىرۋ باعىتىنداعى ۇيىمدار جۇمىس ىستەيدى. بۇل ۇيىمداردا 551 692 ادام تۇراقتى تۇردە سپورتپەن شۇعىلدانادى، بۇل قالا تۇرعىندارىنىڭ جالپى سانىنىڭ 39،1%-ىن قۇرايدى.
سونىمەن قاتار استانا قالاسىندا وليمپيادالىق سپورت تۇرلەرىن دامىتۋ قارقىندى جۇرگىزىلۋدە. قالا قۇراماسىنىڭ 130 سپورتشىسى 35 سپورت تۇرىنەن قازاقستان رەسپۋبليكاسىنىڭ ۇلتتىق قۇراماسىنىڭ شتاتتىق كومانداسىنا ەنگەن. دارىندى سپورتشىلاردى قولداۋ ماقساتىندا 2023 جىلى 15 جوعارى ساناتتى سپورتشىمەن سپورتتىق قىزمەت تۋرالى كەلىسىم جاسالدى.
استانا قالاسىندا سپورتتىق ينفراقۇرىلىمدى دامىتۋ باعىتىنداعى جۇمىستار جۇيەلى تۇردە جۇرگىزىلىپ، تۇرعىنداردىڭ سالاۋاتتى ءومىر سالتىن ۇستانۋىنا بارلىق جاعداي جاسالۋدا.
