Astana turǵyndary NAK Investments júrgizip jatqan turǵyn úi qurylysyna narazylyq bildirýde. Daýly joba elordadaǵy Rysqulov kóshesinde, №2 qalalyq aýrýhana mańynda ornalasqan, dep habarlaidy Dalanews.kz "NewTimes.kz"-ke silteme jasap.
Bul BAYAAN atty biznes-klass sanatyndaǵy turǵyn úi kesheni týraly. Jobaǵa sáikes, munda bes bloktan turatyn toǵyz qabatty úi men jeke avtoturaq salý josparlanǵan. Qurylys jumystary 2026 jyldyń basynda bastalyp, 2027 jyldyń ortasynda aiaqtalýy tiis.
Alaida qala turǵyndary jańa nysan aýrýhana jumysyna kedergi keltirýi múmkin dep alańdaýly. Olardyń aitýynsha, qurylys saldarynan joldar tarylyp, jedel járdem kólikteriniń qatynaýy qiyndaýy yqtimal.
Áleýmettik jelilerde turǵyndar qurylysqa qarsy pikir bildirip jatyr. Keibiri qalada bos jer jetkilikti ekenin aityp, mundai nysandardy meditsinalyq mekemelerdiń janyna salmaý kerektigin alǵa tartýda.
Al qurylys kompaniiasy barlyq jumystar zań aiasynda júrgizilip jatqanyn málimdedi. NAK Investments ókilderiniń sózinshe, joba jergilikti atqarýshy organdarmen kelisilgen jáne qajetti ruqsat qujattary bar.
Qazirgi ýaqytta qurylys alańynda qazanshuńqyr qazylyp, qurylys jumystary qarqyndy júrip jatyr. Júk kólikteri bir ǵana kireberis joldy paidalanyp, aýrýhana mańynda kólik keptelisin týdyrýda.
Astana qalasynyń ákimdigi bul máselege qatysty túsinikteme berdi.
«Joba jańa emes, ol 2024 jyly Bas josparǵa engizilgen. Joba memlekettik saraptamadan ótken, al jer telimi «Baiqadam 2022» JShS-ne tiesili. Qujattarǵa sáikes, bul jerde bastapqyda-aq avtoturaǵy men kiriktirilgen nysandary bar turǵyn úi keshenin salý josparlanǵan», – dep habarlady qalalyq sáýlet, qala qurylysy jáne jer qatynastary basqarmasy.
Aita keteiik, №2 qalalyq aýrýhana – kún saiyn aýyr naýqastar jetkiziletin iri meditsinalyq mekeme. Sondyqtan turǵyndar qurylysqa bailanysty infraqurylymdyq qiyndyqtar densaýlyq saqtaý qyzmetine keri áser etýi múmkin dep qaýiptenedi.
