Astanada tatar-bashqurt mádeni ortalyǵy óziniń 30 jyldyǵyn ulttyq Sabantýi merekesimen atap ótti, – dep habarlaidy Dalanews.kz Astana qalasy ákiminiń baspasóz qyzmetine silteme jasap.
Elorda turǵyndary men qonaqtary úshin mereke Qazaqstan halqy assambleiasy men demeýshilerdiń qoldaýymen uiymdastyryldy.
«Sabantýi» tatar jáne bashqurt halqynyń mádenietin, ana tilin saqtaýǵa degen umtylysty, qonaqjailylyqty beineleidi jáne túrli etnostardyń birligine yqpal etedi.
– Sabantýi – tatar-bashqurttyń ulttyq merekesi. Biz oǵan aldyn ala daiyndaldyq. QHA, «Qoǵamdyq kelisim» KMM jáne Astana ákimdiginiń arqasynda ol jyl saiyn Qazaqstan elordasynda ótip keledi.
Bizdiń merekemiz IýNESKO-ǵa engizilgen jáne Qazaqstannyń barlyq óńirinde ǵana emes, búkil álemde atap ótiledi. Mine, Astana qalasynyń ákimdik janyndaǵy alańynda halqymyzdyń shyǵarmashylyǵyn kórsetip, kontsert ótkizip jatyrmyz. Bul bizdiń ómirimizden, mádenietimizden, tilimizden, dástúrimizden syr shertedi, – dep atap ótti tatar-bashqurt mádeni ortalyǵynyń qurmetti tóraǵasy, Qazaqstan halqy assambleiasy keńesiniń múshesi Rafik Valiev.
Merekege birneshe júz adam qatysty. Al kontserttik baǵdarlamaǵa 150-ge jýyq adam qatysty. Qolónershiler ulttyq buiymdardy, onyń ishinde kiim-keshek, turmystyq zattardy jurtshylyqqa usyndy, sonymen qatar dástúrli taǵamdardan dám tatýǵa bolady.
Qazaqstannyń tatarlary men bashqurttary kongresiniń jetekshisi Taýfik Karimovtyń aitýynsha, sabantýi myń jyl buryn paida bolǵan. Bul halyqtyń «soqa merekesi».
– Jalpy, bul aýyl merekesi, halyqtyq mereke jáne ádette aýylda, egin egilgennen keiin, jaqsy ónim alý úshin ótkiziledi. At jarysy, kúres uiymdastyrylady. Sabantýi ádette asfaltta ótpeidi. Biraq qalalyq jaǵdaida biz tósenishtiń ústinde toilaimyz, basqa jol joq. Al aýyl turǵyndary, árine, topyraq ústinde, kógalda toilaidy, – dedi ol.
Qazirgi sabantýi Astananyń «Tan» tatar-bashqurt ortalyǵynyń 30 jyldyǵyna arnalǵan. Merekege Tatarstannan kelgen ártister Alsý Ahmedzianova men Marat Kárimov qatysty.
Merekege Astanaǵa Qazaqstannyń basqa óńirlerinen de ókilder keldi.
– Biz Semeide de jyl saiyn osy merekeni atap ótemiz ol – Ertis sabantýi dep atalady. Munda kóptegen adam jinalady – shamamen 10-15 myń. Biyl «Ertis sabantýi» Ombyda ótedi, oǵan mindetti túrde qatysýdy josparlap otyrmyz. Biz álemdegi tatarlarmen bailanystamyz. Sabantýi álemniń barlyq derlik elinde – Japoniiada, Avstraliiada, Kanadada, Amerikada, Germaniiada ótkiziledi. Bul – dostyq merekesi, – dep atap ótti Abaiy oblysynyń máslihat depýtaty Rafail Ázipov.
Kontserttik baǵdarlamada Tatarstan men Qazaqstan qalalarynyń ártisteri óner kórsetti. Sondai-aq, qonaqtar halyqtyq oiyndar men jarystarǵa qatysyp, ulttyq tatar jáne bashqurt kiimderiniń kórme-satylymyn tamashalap, ulttyq taǵamdardan dám tatty.
