استانادا تاتار-باشقۇرت مادەني ورتالىعى ءوزىنىڭ 30 جىلدىعىن ۇلتتىق سابانتۋي مەرەكەسىمەن اتاپ ءوتتى، – دەپ حابارلايدى Dalanews.kz استانا قالاسى اكىمىنىڭ باسپا ءسوز قىزمەتىنە سىلتەمە جاساپ.
ەلوردا تۇرعىندارى مەن قوناقتارى ءۇشىن مەرەكە قازاقستان حالقى اسسامبلەياسى مەن دەمەۋشىلەردىڭ قولداۋىمەن ۇيىمداستىرىلدى.
«سابانتۋي» تاتار جانە باشقۇرت حالقىنىڭ مادەنيەتىن، انا ءتىلىن ساقتاۋعا دەگەن ۇمتىلىستى، قوناقجايلىلىقتى بەينەلەيدى جانە ءتۇرلى ەتنوستاردىڭ بىرلىگىنە ىقپال ەتەدى.
– سابانتۋي – تاتار-باشقۇرتتىڭ ۇلتتىق مەرەكەسى. ءبىز وعان الدىن الا دايىندالدىق. قحا، «قوعامدىق كەلىسىم» كمم جانە استانا اكىمدىگىنىڭ ارقاسىندا ول جىل سايىن قازاقستان ەلورداسىندا ءوتىپ كەلەدى.
ءبىزدىڭ مەرەكەمىز يۋنەسكو-عا ەنگىزىلگەن جانە قازاقستاننىڭ بارلىق وڭىرىندە عانا ەمەس، بۇكىل الەمدە اتاپ وتىلەدى. مىنە، استانا قالاسىنىڭ اكىمدىك جانىنداعى الاڭىندا حالقىمىزدىڭ شىعارماشىلىعىن كورسەتىپ، كونسەرت وتكىزىپ جاتىرمىز. بۇل ءبىزدىڭ ومىرىمىزدەن، مادەنيەتىمىزدەن، تىلىمىزدەن، داستۇرىمىزدەن سىر شەرتەدى، – دەپ اتاپ ءوتتى تاتار-باشقۇرت مادەني ورتالىعىنىڭ قۇرمەتتى ءتوراعاسى، قازاقستان حالقى اسسامبلەياسى كەڭەسىنىڭ مۇشەسى رافيك ۆالييەۆ.
مەرەكەگە بىرنەشە ءجۇز ادام قاتىستى. ال كونسەرتتىك باعدارلاماعا 150-گە جۋىق ادام قاتىستى. قولونەرشىلەر ۇلتتىق بۇيىمداردى، ونىڭ ىشىندە كيىم-كەشەك، تۇرمىستىق زاتتاردى جۇرتشىلىققا ۇسىندى، سونىمەن قاتار ءداستۇرلى تاعامداردان ءدام تاتۋعا بولادى.
قازاقستاننىڭ تاتارلارى مەن باشقۇرتتارى كونگرەسىنىڭ جەتەكشىسى تاۋفيك كاريموۆتىڭ ايتۋىنشا، سابانتۋي مىڭ جىل بۇرىن پايدا بولعان. بۇل حالىقتىڭ «سوقا مەرەكەسى».
– جالپى، بۇل اۋىل مەرەكەسى، حالىقتىق مەرەكە جانە ادەتتە اۋىلدا، ەگىن ەگىلگەننەن كەيىن، جاقسى ءونىم الۋ ءۇشىن وتكىزىلەدى. ات جارىسى، كۇرەس ۇيىمداستىرىلادى. سابانتۋي ادەتتە اسفالتتا وتپەيدى. ءبىراق قالالىق جاعدايدا ءبىز توسەنىشتىڭ ۇستىندە تويلايمىز، باسقا جول جوق. ال اۋىل تۇرعىندارى، ارينە، توپىراق ۇستىندە، كوگالدا تويلايدى، – دەدى ول.
قازىرگى سابانتۋي استانانىڭ «تان» تاتار-باشقۇرت ورتالىعىنىڭ 30 جىلدىعىنا ارنالعان. مەرەكەگە تاتارستاننان كەلگەن ارتىستەر السۋ احمەدزيانوۆا مەن مارات كارىموۆ قاتىستى.
مەرەكەگە استاناعا قازاقستاننىڭ باسقا وڭىرلەرىنەن دە وكىلدەر كەلدى.
– ءبىز سەمەيدە دە جىل سايىن وسى مەرەكەنى اتاپ وتەمىز ول – ەرتىس سابانتۋي دەپ اتالادى. مۇندا كوپتەگەن ادام جينالادى – شامامەن 10-15 مىڭ. بيىل «ەرتىس سابانتۋي» ومبىدا وتەدى، وعان مىندەتتى تۇردە قاتىسۋدى جوسپارلاپ وتىرمىز. ءبىز الەمدەگى تاتارلارمەن بايلانىستامىز. سابانتۋي الەمنىڭ بارلىق دەرلىك ەلىندە – جاپونيادا، اۆستراليادا، كانادادا، امەريكادا، گەرمانيادا وتكىزىلەدى. بۇل – دوستىق مەرەكەسى، – دەپ اتاپ ءوتتى ابايى وبلىسىنىڭ ءماسليحات دەپۋتاتى رافايل ءازىپوۆ.
كونسەرتتىك باعدارلامادا تاتارستان مەن قازاقستان قالالارىنىڭ ارتىستەرى ونەر كورسەتتى. سونداي-اق، قوناقتار حالىقتىق ويىندار مەن جارىستارعا قاتىسىپ، ۇلتتىق تاتار جانە باشقۇرت كيىمدەرىنىڭ كورمە-ساتىلىمىن تاماشالاپ، ۇلتتىق تاعامداردان ءدام تاتتى.
