Astana qalasynda Jastar saiasaty máseleleri basqarmasy, «Astana jastary» resýrstyq ortalyǵy, Eńbek mobildiligi ortalyǵynyń uiymdastyrýymen L.Gýmilev atyndaǵy Eýraziia ulttyq ýniversitetinde jastarǵa arnalǵan bos jumys oryndary jármeńkesi ótti. Is-sharaǵa 2 myńǵa jýyq adam qatysyp, 80-nen astam mekeme jumys usyndy, – dep habarlaidy Dalanews.kz Astana qalasy ákiminiń baspasóz qyzmetine silteme jasap.
Jármeńke jumys berýshi men jumys izdeýshi arasyndaǵy tikelei bailanys arqyly bilim berý uiymdarynyń túlekterin, sol siiaqty jumyssyz jastardy jumysqa ornalastyrýǵa járdemdesýge baǵyttaldy.
– Jármeńkege ulttyq jáne jekemenshik kompaniialar, memlekettik uiymdar sekildi birqatar jumys berýshiler qatysyp, joǵary oqý orny túlekterine, stýdentterge jáne elorda jastaryna bos jumys oryndaryn usyndy. Bizdiń basqarma tarapynan mundai jármeńkeler jii uiymdastyrylady. Sebebi osyndai is-sharalardyń arqasynda jastar ózderi qalaǵan mekemelerge jumysqa ornalasyp jatady. Iaǵni, jármeńkeniń tiimdiligi – jastar birqatar kompaniia ókilderimen bir alańda tildesip, qyzyqtyrǵan suraqtaryna jaýap alady, – dedi óz sózinde qalalyq Jastar saiasaty máseleleri basqarmasynyń oqý oryndarymen jáne jastar uiymdarymen jumys bólimi basshysynyń mindetin atqarýshy Erlan Aidar.
Eńbek mobildiligi ortalyǵynyń direktory Oljas Omar jármeńkede joǵary oqý ornyn jańa bitirgen jas mamandar úshin óz mamandyǵy boiynsha «Jastar praktikasy» baǵdarlamasy arqyly da jumys tabýǵa bolatynyn atap ótti.
Biyl bas qalada jastarǵa arnalǵan osyndai 6 bos jumys oryndary jármeńkesi uiymdastyrylyp, is-sharaǵa turaqty túrde qatysatyn jumys berýshiler sany artýda. Olardyń qatarynda Memlekettik qyzmet isteri agentiginiń Astana qalasy boiynsha departamenti, Ulttyq qaýipsizdik komiteti jáne basqa jetekshi mekemeler men kásiporyndar, jekemenshik kompaniialar bar. Bilim, saýda, qarjy, qurylys salasyndaǵy mekemeler jumys izdep júrgen azamattarǵa aqparattyq-túsindirý jumystaryn júrgizip, túiindemelerin qabyldady.
Jekemenshik kompaniianyń direktory Arman Qurmanáliev seriktestiktiń bos jumys oryndary jármeńkesine alǵash ret qatysqanyn aitty.
– Kompaniia naryqta 15 jyl ýaqyt boiy energiia únemdeýshi jaryq kózderi men elektr taýarlaryn satýmen ainalysady. Sondyqtan bizge marketing bólimine satý mamandary qajet. Dese de, kompaniianyń ózge de bos jumys oryndaryna jastardy qýana qabyldaimyz. Jumys izdeýshilerge aitarlyqtai talap qoiylmaidy, diplomnyń bolýy da shart emes. Bastysy, jumys isteimin degen jalyndy jastar bolsa, túiindemesin qarastyramyz, – dedi ol.
Jumys berýshilermen tikelei sóilesip, birden birneshe uiymǵa suhbattasýǵa shaqyrtý alyp úlgergen elordalyq jastyń biri, L.Gýmilev atyndaǵy Eýraziia ulttyq ýniversitetiniń 4-kýrs stýdenti Kamila Ospandiiarqyzy boldy.
– Men – qurylys fakýltetiniń bilim alýshysymyn. Ózim geodezist jáne kartograf mamandyqtaryna qatysty bos jumys ornyn usynǵan mekemelermen tildestim. Jármeńkede ózim qalaǵan kompaniialardy da kezdestirgenime rizamyn. Jumys berýshilerdiń usynatyn jalaqy mólsheri de kóńilden shyǵady. Mundai jármeńkeler jastar úshin jańa kásiporyndarmen tanysýǵa da taptyrmas múmkindik dep oilaimyn, – dedi stýdent.
