استانا قالاسىندا جاستار ساياساتى ماسەلەلەرى باسقارماسى، «استانا جاستارى» رەسۋرستىق ورتالىعى، ەڭبەك موبيلدىلىگى ورتالىعىنىڭ ۇيىمداستىرۋىمەن ل.گۋميليەۆ اتىنداعى ەۋرازيا ۇلتتىق ۋنيۆەرسيتەتىندە جاستارعا ارنالعان بوس جۇمىس ورىندارى جارمەڭكەسى ءوتتى. ءىس-شاراعا 2 مىڭعا جۋىق ادام قاتىسىپ، 80-نەن استام مەكەمە جۇمىس ۇسىندى، – دەپ حابارلايدى Dalanews.kz استانا قالاسى اكىمىنىڭ باسپا ءسوز قىزمەتىنە سىلتەمە جاساپ.
جارمەڭكە جۇمىس بەرۋشى مەن جۇمىس ىزدەۋشى اراسىنداعى تىكەلەي بايلانىس ارقىلى ءبىلىم بەرۋ ۇيىمدارىنىڭ تۇلەكتەرىن، سول سياقتى جۇمىسسىز جاستاردى جۇمىسقا ورنالاستىرۋعا جاردەمدەسۋگە باعىتتالدى.
– جارمەڭكەگە ۇلتتىق جانە جەكەمەنشىك كومپانيالار، مەملەكەتتىك ۇيىمدار سەكىلدى ءبىرقاتار جۇمىس بەرۋشىلەر قاتىسىپ، جوعارى وقۋ ورنى تۇلەكتەرىنە، ستۋدەنتتەرگە جانە ەلوردا جاستارىنا بوس جۇمىس ورىندارىن ۇسىندى. ءبىزدىڭ باسقارما تاراپىنان مۇنداي جارمەڭكەلەر ءجيى ۇيىمداستىرىلادى. سەبەبى وسىنداي ءىس-شارالاردىڭ ارقاسىندا جاستار وزدەرى قالاعان مەكەمەلەرگە جۇمىسقا ورنالاسىپ جاتادى. ياعني، جارمەڭكەنىڭ تيىمدىلىگى – جاستار ءبىرقاتار كومپانيا وكىلدەرىمەن ءبىر الاڭدا تىلدەسىپ، قىزىقتىرعان سۇراقتارىنا جاۋاپ الادى، – دەدى ءوز سوزىندە قالالىق جاستار ساياساتى ماسەلەلەرى باسقارماسىنىڭ وقۋ ورىندارىمەن جانە جاستار ۇيىمدارىمەن جۇمىس ءبولىمى باسشىسىنىڭ مىندەتىن اتقارۋشى ەرلان ايدار.
ەڭبەك موبيلدىلىگى ورتالىعىنىڭ ديرەكتورى ولجاس ومار جارمەڭكەدە جوعارى وقۋ ورنىن جاڭا بىتىرگەن جاس ماماندار ءۇشىن ءوز ماماندىعى بويىنشا «جاستار پراكتيكاسى» باعدارلاماسى ارقىلى دا جۇمىس تابۋعا بولاتىنىن اتاپ ءوتتى.
بيىل باس قالادا جاستارعا ارنالعان وسىنداي 6 بوس جۇمىس ورىندارى جارمەڭكەسى ۇيىمداستىرىلىپ، ءىس-شاراعا تۇراقتى تۇردە قاتىساتىن جۇمىس بەرۋشىلەر سانى ارتۋدا. ولاردىڭ قاتارىندا مەملەكەتتىك قىزمەت ىستەرى اگەنتىگىنىڭ استانا قالاسى بويىنشا دەپارتامەنتى، ۇلتتىق قاۋىپسىزدىك كوميتەتى جانە باسقا جەتەكشى مەكەمەلەر مەن كاسىپورىندار، جەكەمەنشىك كومپانيالار بار. ءبىلىم، ساۋدا، قارجى، قۇرىلىس سالاسىنداعى مەكەمەلەر جۇمىس ىزدەپ جۇرگەن ازاماتتارعا ءاقپاراتتىق-تۇسىندىرۋ جۇمىستارىن جۇرگىزىپ، تۇيىندەمەلەرىن قابىلدادى.
جەكەمەنشىك كومپانيانىڭ ديرەكتورى ارمان قۇرمانالييەۆ سەرىكتەستىكتىڭ بوس جۇمىس ورىندارى جارمەڭكەسىنە العاش رەت قاتىسقانىن ايتتى.
– كومپانيا نارىقتا 15 جىل ۋاقىت بويى ەنەرگيا ۇنەمدەۋشى جارىق كوزدەرى مەن ەلەكتر تاۋارلارىن ساتۋمەن اينالىسادى. سوندىقتان بىزگە ماركەتينگ بولىمىنە ساتۋ ماماندارى قاجەت. دەسە دە، كومپانيانىڭ وزگە دە بوس جۇمىس ورىندارىنا جاستاردى قۋانا قابىلدايمىز. جۇمىس ىزدەۋشىلەرگە ايتارلىقتاي تالاپ قويىلمايدى، ديپلومنىڭ بولۋى دا شارت ەمەس. باستىسى، جۇمىس ىستەيمىن دەگەن جالىندى جاستار بولسا، تۇيىندەمەسىن قاراستىرامىز، – دەدى ول.
جۇمىس بەرۋشىلەرمەن تىكەلەي سويلەسىپ، بىردەن بىرنەشە ۇيىمعا سۇحباتتاسۋعا شاقىرتۋ الىپ ۇلگەرگەن ەلوردالىق جاستىڭ ءبىرى، ل.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ 4-كۋرس ستۋدەنتى كاميلا وسپانديار قىزى بولدى.
– مەن – قۇرىلىس فاكۋلتەتىنىڭ ءبىلىم الۋشىسىمىن. ءوزىم گەودەزيست جانە كارتوگراف ماماندىقتارىنا قاتىستى بوس جۇمىس ورنىن ۇسىنعان مەكەمەلەرمەن تىلدەستىم. جارمەڭكەدە ءوزىم قالاعان كومپانيالاردى دا كەزدەستىرگەنىمە ريزامىن. جۇمىس بەرۋشىلەردىڭ ۇسىناتىن جالاقى مولشەرى دە كوڭىلدەن شىعادى. مۇنداي جارمەڭكەلەر جاستار ءۇشىن جاڭا كاسىپورىندارمەن تانىسۋعا دا تاپتىرماس مۇمكىندىك دەپ ويلايمىن، – دەدى ستۋدەنت.
